La FIDMA va contar con un Día de la Llingua Asturiana

El sábadu 20 d’agostu va celebrase oficialmente na LXV Feria Internacional de Muestres d’Asturies (FIDMA) el Día de la Llingua Asturiana. La Cámara de Comerciu de Xixón vio con bonos güeyos el pidimientu d’Iniciativa pol Asturianu de dedicar una xornada al nuesu idioma, con una visita institucional y actividaes en tol recintu ferial.

La más importante de les feries celebraes n’Asturies, como amuesen los sos más de 700.000 visitantes nes sos dos selmanes de llargor y la presencia de 2.000 empreses de dientro y fuera del país, va dedicar ún de los sos díes a la llingua asturiana. La organización del eventu incorpora asina una xornada col nuesu idioma como protagonista que se suma a los yá tradicionales del Deporte, de les Persones Mayores, del Tresporte, de los Donantes de Sangre o del Banco Sabadell.

En concreto, l’asturianu va compartir el 20 d’agostu col Día de la Familia Numberosa. Una xornada con programa entovía por zarrar, pero que yá cuenta con delles actividaes confirmaes.

Pela mañana va celebrase una visita institucional, cola presencia d’Antón García, direutor xeneral de Política Llingüística, y posiblemente de Berta Piñán, cuestión que depende de que la conseyera de Cultura, Política Llingüística y Turismu pueda cuadralo coles sos vacaciones. Va haber visites guiaes al Muséu del Pueblu d’Asturies, xuegos pa la reciella na instalación, repartu de material de la Oficina de Normalización Llingüística y un recital en collaboración cola Asociación d’Escritores d’Asturies, amás d’un posible homenaxe a Xovellanos.

Estos díes tamién hai conversaciones con Mieres, Llangréu o Xixón pa entamar aiciones nos sos pabellones, asina como con delles empreses privaes. “L’asturianu ta presente na Feria en munchos sitios más allá del nuesu pabellón y con esta xornada tamién queremos da-yos visibilidá, amás de llevar l’idioma a tol recintu ferial”, apunten dende Iniciativa pol Asturianu, que repite col so espaciu propiu nel que da agospiu nesta ocasión a una docena de firmes qu’usen la llingua asturiana con normalidá nel so día a día y nos sos productos.

La FIDMA va inaugurase’l vienres a les 18 hores cola presencia de la ministra d’Educación y Formación Profesional, Pilar Alegría, y del presidente Adrián Barbón. Pal públicu va abrir les puertes el día siguiente y l'actividá va caltenese nel Recintu Ferial Luis Adaro hasta'l domingu 21.

Na semeya, entrada al Recintu Ferial Luis Adaro na edición pasada de la FIDMA.