Les bases del Benidorm Fest igualen la llingua asturiana y l'aragonés a idiomes estranxeros.
Un artista asturianu nun va poder participar nel festival que clasifica pa Eurovisión 2023 con un cantar n'asturianu dafechu. Como muncho pue incluyir un 40 por cientu de la lletra na so llingua nun cantar en castellanu, gallegu, eusquera, catalán o aranés, úniques nes que se pue participar.
"Deberá incluyir lletra (nun pudiéndose incluyir cantares esclusivamente instrumentales), n'idioma castellanu y/o llingües cooficiales d'España. Tamién s'aceptan canciones con dalgunos cachos en llingües non oficiales d'España y idiomes estranxeros, siempre y cuando tales fragmentos nun superen el 40 por cientu del total de la lletra de la canción", afita'l reglamentu na parte dedicada a los 'Requisitos de participación".
Asina, la falta d'oficialidá condiciona una vegada más al asturianu, en desigualdá col restu de llingües estatales. De tar presente nel Benidorm Fest, como asocedió l'añu pasáu nun xestu de Tanxugueiras nel so cantar en gallegu 'Terra', dando una gran visibilidá al idioma, sería de manera práuticamente aneudótica.
Mesmu formatu d'eleición
Ente les novedaes de la segunda edición del Benidorm Fest ta l'ampliación del númberu de concursantes, de 14 a 16. Nun va camudar, sicasí, el criticáu modelu de seleición que dexó fuera a Tanxugueiras, favorites del públicu, con un 50 por cientu de pesu del xuráu profesional, qu'esti añu va presidir Nacho Cano, por un 25 por cientu pal televotu y otru 25 al demoscópicu.
Les semifinales van celebrase'l 31 de xineru y el 2 de febreru, mentes que la final va ser el 4 de febreru. El plazu pa presentar cantares va abrise'l 1 de setiembre y va pesllase'l 10 d'ochobre.
Na semeya, Tanxugueiras na final del primer Benidorm Fest.
Adxuntu | Tamañu |
---|---|
![]() | 279.56 KB |