La falta de ñeve, una torga pal proyectu d'estación nel altu Ayer

Les vacaciones de navidá tan equí y la falta de ñeve amenaza con cancelar les reserves nes estaciones d'esquí de Payares y la llionesa de San Isidro, que teníen contrataes cásique toles reserves. Énte esti panorama, al que cada vegada tamos más avezaos pol cambéu climáticu, otru interrogante más vien a mangase nel proyectu de la estación d'esquí de "Fuentes de Invierno" un de los proyectos estrella que va facer el Principáu con cargu a los fondos mineros esti añu, como esplicó la conseyera de cultura Ana Rosa Migoya cuando presentó los presupuestos d'esti añu.

Esti proyectu, que se cuenta con echar a andar nel añu 2005, supón una inversión penriba los 42 millones d´euros, cerca de 7.000 millones de pesetes. La futura estación, que se xustifica como un complementu a les anticuaes y pequñes instalaciones de Payares, va tener siete pistes con venti kilómetros en total xunta un potente sistema d´innivación artificial y aparcaderu pa 1.350 turismos y 40 autocares xunta los accesos per carretera. Pero lo que más interés tien pal conceyu d´Ayer ye´l nuevu plan urbanísticu arreyáu a la estación, que va llevar al llugar un residencial con xalés individuales y adosaos y bloques d´apartamentos.

La intención de sacalo alantre ye clara, y asina'l diseñu de la estación yá ta decidíu, facelu l´andorrana Semsa (Servicios y Equipamientos de Montaña, S.A.), empresa especializada nel diseñu de pistes y remontes. Esta mesma empresa dixo que´l plan de "Fuentes de invierno" va tener d´entamu un retrasu de seyes meses, en parte polos trámites alministrativos. Esta compañía va llevar namás el tema del diseñu deportivu por que nel tema de promoción de la futura estación la Dirección Xeneral de Deportes d´Asturies ya dio anuncia de que se van vender xuntos nun únicu paquete turísticu la ufierta de Fontes d´Iviernu y la de la estación de Payares.

Pero amás de los burocráticos, el plan d'inversiones del Gobiernu asturianu nel altu Ayer tien entovía dellos problemes ensin esclariar: l'impactu ambiental de la estación, que supón llevar per delantre toa una fastera, la dotación d´agua y saneamientu, la dura competencia de San Isidro, les males perspectives de ñeve de la futura estación por culpa del cambéu climatolóxicu…. Con too y con ello los alcaldes de la zona ya falen de colocar la fastera asturllionesa ente les cinco primeres estaciones d'esquí de la península. Dalgo mui lloñe de la realidá ya que l'innivación na zona ye mui probe. Otramiente, al impactu mediuambiental de la estación axúntase l'impactu social y económicu de cómo pueda repercutir nel preciu de la vivienda de la rodiada la construcción masivo de segundes viviendes pa turistes

El retrasu de les obres mayores nun diz que'l proyectu tea paráu. Asina, ente los proyectos que yá entamaron a funcionar dientro del plan de "Fuentes de invierno" ta'l remocicáu albergue de Toribión de L.lanos, que, con una inversión penriba´l mediu millón d´euros, tien cerca del centenar de places empobinaes a esquiadores de fuera d´Asturies. Como'l restu de los proyectos del plan, l'albergue tien el sofitu económicu del plan complementariu pa les cuenques, que presenta delles iniciatives más a entamar dientro d´esti plan estrella, casu de la meyora de les pistes y la merca de maquinaria pisañeve nuevo, too ello con un presupuestu de 300.000 euros. Tamién ta trabayándose na construcción d´un edificiu de servicios múltiples.

A la otra parte del cordal, l'alministración de Llión nun ve bien la posible competencia que-y va facer a San Isidro esti macro plan que lleva una bona parte de les perres dedicaes a la reindustrialización de les cuenques, y tamién los proyectos que'l Principáu cuenta con echar a andar cola estación como pegoyu. Asina, anque dende la Dirección Xeneral de Deportes d´Asturies que dirixe Daniel Gutiérrez Granda tan pol llabor de fusionar les estaciones asturianes de Payares y "Fuentes de invierno" cola de San Isidro, los llioneses nun lo ven bien, y ye que l'apueste llionés ye la collaboración ente les dos estaciones, pero tomando como referencia San Isidro. El casu ye qu'a la Diputación de Llión nun-yos dan mieu les inversiones asturianes en cuantes que consideren que´l proyectu astur ye namás de calter urbanísticu pola poca ñeve qu'hai nesa parte asturiana, colo que l'interés deportivu sigue calteniéndolu la estación llionesa de San Isidro.