La estación de La Pola pierde'l topónimu oficial pa llucir de vuelta'l derogáu 'Pola de Lena'

La llegada de la velocidá alta ferroviaria a Asturies ta provocando cambios na instalación, incluyida la so cartelería.

Los indicadores nuevos que tán instalándose na estación de La Pola, primer parada n'Asturies de los Alvia que van emplegar la variante de Payares dende'l miércoles, presenta'l topónimu derogáu 'Pola de Lena'. Un cambiu que sorprende entá más al sustituyir lletreros con menos d'un añu de vida nel que por fin s'emplegaba l'únicu topónimu oficial, l'asturianu 'La Pola'.

El ḷḷenizu Héctor Torre decatóse d'estes modificaciones na xornada de güei y fixo una denuncia pública na rede social X xunto con semeyes onde se ve ún de los 'vieyos' con 'La Pola' del color encarnáu que s'emplega pa cercaníes retiráu y ún de los nuevos elementos, cola señalética blanca de llarga distancia, nel que se llee 'Pola de Lena'. Los trabayos entá nun finalizaron y queda por ver si se van sustituyir la totalidá d'ellos na estación o namás la parte que s'emplegue pa l'alta velocidá ferroviaria.

Esti retrocesu llega, amás, nun momentu nel que Renfe y Adif entamaben a emplegar la toponimia oficial na páxina web y nes pantalles de les estaciones de tren, asina como na cartelería nueva d'estaciones como, precisamente, la de La Pola.

Na semeya superior, ún de los cartelos nuevos instalaos, y na inferior, los esistentes hasta agora. Na del mensaxe de X pue vese un indicador coloráu col topónimu oficial 'La Pola' retiráu.

Na estación de La Pola, Ḷḷena @Adif_es ta quitando los carteles col topónimu oficial La Pola y poniendo unos que traen Pola de Lena que ye un topónimu que nun existe....... @IniciativaxAst poco duró el respetu a la toponimia oficial na estación del "AVE".... pic.twitter.com/NPRhA8bBjz

— Héctor Torre ⚒ (@hector_torre) November 23, 2023