La entrega de los AMAS y la presentación del discu de Skontra protagonicen el fin de selmana

La gala d’entrega de los VI Premios AMAS nel Teatru Filarmónica d’Uviéu va ser l'eventu más destacáu d'esti vienres. Mentes, el sábadu’l protagonismu va ser pa Skontra, que presenta en Xixón el so disco nuevu ‘Mazcando miseries’.
 
La VI Gala d’Entrega de los Premios AMAS, nome que toma del Anuariu de la Música n’Asturies, va atrayer a una gran cantidá de músicos al Teatro Filarmónica d’Uviéu, munchos d’ellos nominaos en dalgunes de les 20 categoríes nes que se dividen estos galardones. L’eventu va principiar a les 21 hores.
 
El sábadu, el turnu va ser de Skontra, qu’esti añu cumple 10 años y va celebralo con un conciertu especial nel Savoy (20.30 hores) nel que van presentar n’Asturies los temes del so discu nuevu ‘Mazcando miseries’. El públicu que s’avere al Savoy va poder disfrutar d’una actuación enllena de collaboraciones y sorpreses, como la presencia d’ex miembros del grupu. Amás, Txema Selektah va pinchar clásicos nel descansu del conciertu, que va tener un preciu de 5 euros, 10 col 'Mazcando miseries' incluyíu.
 
Amás d’estes actuaciones, tamién destaquen los conciertos de Blues&Decker (22 hores, Sweet Home d’Uviéu),  y Peret (21.30 hores, El Parche, Avilés), el vienres; de la orquestina folk De Mandilín (21.30 hores, Taberna Cuévano de La Pola Siero) y d’El Diablo dijo NO (21 hores, Acapulco de Xixón), el sábadu. Mentes, el grupu vascu de rythm&blues Travellin Brothers va ofrecer dos conciertos: el vienres nel Savoy (23.59 hores) y el sábadu en Cuideiru (El Paso, 23.59 hores). Otra manera, el Concursu de Folclore Ciudá d’Uviéu va vivir una xornada nueva’l domingu, a les 11.45 hores, nel Teatru Filarmónica.