La enmienda pa equiparar la partida de l’ALLA nos PXE cola del restu d’academies tuvo’l refugu de los diputaos asturianos

Namái la diputada Sofía Fernández Castañón votó a favor de que l’Academia de la Llingua Asturiana (ALLA) tuviera una partida igual que la del restu d’academies. Los otros seis representantes de los asturianos en Madrid refugaron esta enmienda a los Presupuestos Xenerales del Estáu (PXE) presentada por Xuníes Podemos.

El xueves pasó’l trámite del Congresu’l Proyeutu de Llei de Presupuestos Xenerales del Estáu pal añu 2023, qu’agora va al Senáu pa la so aprobación definitiva. Fíxolo col apoyu de los partíos del Gobiernu de coalición, PSOE y Xuníes Podemos, y el d’ERC, EAJ-PNV, EH Bildu, PDeCAT, Más País-EQUO, Coalición Canaria-PNC-Nueva Canarias, Mes Compromís y PRC, un total de 187 votos a favor por 156 en contra (los de PP, VOX, Ciudadanos, Junts per Catalunya, CUP, el diputáu de Foro Isidro Martínez Oblanca y los dos espulsaos d’UPN) y 1 astención, del BNG.

Les cuentes definitives nun van contar finalmente cola dotación adicional de 283.170 euros que Xuníes Podemos pidía pa l’ALLA al ser refugada’l martes la so enmienda cola votación en contra de tolos diputaos asturianos cola esceición única de la d’esta coalición, Fernández Castañón. D’esta forma pidíase que la institución asturiana, que recibe 50.000 euros, contara con una partida final de 333.170 euros, la mesma que la de Real Academia Galega y l’Institut d’Estudis Catalans.

Les socialistes Adriana Lastra, María Luis Carcedo –les dos de forma telemática– y Roberto García Morís, la popular Paloma Gázquez y el representantes de Foro, Martínez Oblanca, optaron pol ‘non’, mentes que’l de VOX, José María Figaredo nun votó, al igual que nengún de los sos compañeros de partíu. Xunto al PSOE y PP refugaron esta posibilidá Ciudadanos, EAJ-PNV, PDeCAT, Coalición Canaria-PNC-Nueva Canarias, los dos espulsaos d’UPN y Pablo Cambronero, tránsfuga de Ciudadanos.

Mentes, astúvose Mes Compromís, Junts per Catalunya, Más País-EQUO, BNG, y Teruel Existe, polo que namái sofitaron’l pidimientu de Xuníes Podemos los partíos ERC, EH Bildu y CUP. El resultáu final foi 53 ‘sí’, 231 ‘non’ y 9 astenciones, con 56 diputaos ensin exercer votu.

Argumentos de la enmienda

Nel testu de la enmienda, la númberu 3.764, la coalición argumentaba que “el llabor tresversal que desenvuelve l’Academia de la Llingua Asturiana, asina como’l volume de les funciones que desendolca, ameriten una dotación presupuestaria equiparada a la de les instituciones homólogues dedicaes a otres llingües del Estáu que reciben tresferencies del Ministeriu de Ciencia y Innovación al traviés de los Presupuestos Xenerales del Estáu”.

Na semeya, el Congresu na sesión na que se votó la enmienda.