La encuesta del CIS da-y l'absoluta al PP

Ta acabante d'espublizase la encuesta electoral del Centru d'Investigaciones Sociolóxiques (CIS). La encuesta da-y la mayoría absoluta nes elecciones xenerales del 14 de marzu al Partíu Popular, qu'algamaría 176 escaños col 42,2% del votu, quedando'l PSOE como segunda fuerza nel estáu con 131 escaños y el 35,5% del votu (seyes escaños más de los que tien agora). D'esta manera, l'escenariu electoral qu'albidra'l CIS apunta que'l PP va recular en votos pero va caltener la mayoría absoluta, mientres que los socialistes van tener un feble avance respective al 2000. Los demás partíos que sacaríen representación en Congresu sedríen CiU con doce escaños (trés menos de los que tien agora). Izquierda Xunida sacaría diez 10 escaños, los 8 que tien agora más dos d'Iniciativa per Catalunya-Verts, PNV siete y ERC seyes (cinco más de los que tien agora). Con trés escaños caún quedaríen el BNG y Coalición Canaria, y con ún Eusko Alkartasuna y la Chunta Aragonesista. La oposición al gobiernu lleva tiempu duldando de la fiabilidá de la encuesta del CIS, institución que depende directamente del Ministeriu de la Presidencia, pero'l Gobiernu empondera la fiabilidá de la investigación, pa la que s'entrevistaron a 24.109 ciudadanos.

La encuesta inclúi datos específicos pa cada circunscripción electoral. Nel casu asturianu, el PP sal el más votáu, con una intención de votu directa de votu na encuesta del 23,7%. Hai que tener en cuenta que'l CIS estrema los resultaos ente lo que ye la rempuesta directa a la entruga de la encuesta y la proyección final d'intención de votu que se perita acordies a una formula de proyección de datos iguada polos técnicos del CIS. Ello ye asina qu'esi 23,7% conviértese nuna intención de votu final estimada acordies al sistema de proyección del CIS del 43,9%. El PSOE tendría n'intención directa de votu un 24,5%, más que'l PP, pero'l sistema de proyección de datos del CIS perita pa la llista d'Álvaro Cuesta un 38,3% de votu final. Izquierda Xunida tien una intención directa del 4,9% y una estimación final del 10,8%. Con estos datos, el PP sacaría per Asturies 4 escaños, 3 el PSOE y 1 Izquierda Xunida. Darréu vien la sorpresa, y ye que la encuesta del CIS, con venir col sellu de "oficial" y presentase como la más seria y científica, presenta a la URAS, que dio anuncia va tiempu de que nun diba presentase a estes xenerales, como cuarta fuerza con más intención de votu. El partíu de Sergio Marqués apaez nos datos del CIS per detrás d'Izquierda Xunida con un 0,4% del votu final (sobre 2.500 votos) mientres que les demás candidatures en xuegu repartiríense'l 3,6% de los sufraxos, que sedríen cerca de 22.000 papeletes acordies a la estimación de participación, que ye del 68,8%.