La empresa de telefonía Nordés Móvil recibe l’Andrés Solar de la XDLA

|
Páxina web de Nordés Móvil

El premiu de la Xunta Pola Defensa de la Llingua reconoz el llabor d’entidaes o persones en favor del asturianu.

Nordés Móvil, empresa de telefonía asturiana, resultó ganadora de la edición XXXVII del Premiu Andrés Solar. La Xunta pola Defensa de la Llingua Asturiana (XDLA) valoró “de manera mui positiva l’usu de la nuestra llingua nel sector tecnolóxicu y de les comunicaciones que, nestos tiempos, formen una parte importante de la vida de un porcentaxe altu de la población”.

Amás, la XDLA destacó que “esti añu 2022, foron delles les candidatures propuestes como merecedores del Premiu Andrés Solar, lo que ye un signu mui positivu de la vitalidá de les iniciatives d'usu normalizáu del asturianu y de la voluntá de tantos asturianos y asturianes de vivir na so llingua materna”.

Na páxina web de Nordés Móvil nun sólo pue escoyese l’idioma asturianu pal testu escrito, sinón tamién pa les comunicaciones por teléfonu cola empresa. Amás, les tarifes lleven nomes venceyaos a la cultura propia, como ‘Piquiñina’, ‘Somedana’, ‘Nuberu’, ‘Galana’ o ‘Picu Urriellu’. N’ediciones anteriores foron premiaos col Pegollu la empresa de diseñu testil Puru Remangu o la mesma familia del autor Andrés Solar.

Contador Estadistiques