La Cuenca'l Nalón acusa más el paro

La estadística del paro por conceyos nesti mes de xunetu rescampla
les desigualdaes territoriales del mercáu llaboral asturianu.



Anque'l paro baxare espectacularmente en xunetu, yá cuando adelantamos
nesti mesmu mediu los resultaos, veíase que la interanual ente'l 2.002 y
el 2.003 dexaba un saldu negativu, rexistrándose 515 paraos más
na global de los doce meses. Ello foi que'l paro baxó en 70 de los 78
conceyos asturianos nesi mes, y nos 8 que xubió fízolo de manera
cásique simbólica. Sicasí, l'acumulada del añu
2.002 - 2.003 da que'l paro xubió en en 39 de los 78 conceyos, xusto la metada, lo que rescampla les desigualdaes territoriales nel mercáu llaboral
astur.

Separtando del estudiu los conceyos más pequeños, nos que les variaciones porcentuales resulten escandaloses pero son poco representatives (Asina en Pezós, cola colocación de 9 persones el paro baxa'l 69%), resulta que ente les tres grandes ciudaes del país Uviéu y Avilés nun rexistren datos que llamen l'atención mercáu llaboral ta en crisis en en Xixón, col
2,07% más de paraos, y sobremanera na cuenca del Nalón, con Llangréu
acumulando una xuba del 8,68%, Llaviana del 10,70%, y Samartín del Rei Aurelio del 11,67%, mientres que na del Caudal Mieres queda cásique a pré con un 0,20% más de paro. Ente los conceyos de tamañu mediu, nel centru d'Asturies Llanera esperimenta tamién un aumentu del paru, con un 15,09% más que va un añu, y pel oriente Parres y Llanes queden col 13,76% y 12,2% más, respectivamente. Lameyor parte nel balance llévenla los conceyos del occidente, que tienen toos ellos baxaes más o menos discretes, casu del -12% de Cangas del Narcea o el -4,64% de Salas.