La Coordinadora, satisfecha pol anunciu del acondicionamientu del calce de dos regueros en Cangas

La Confederación Hidrográfica del Cantábricu (CHC) va acondicionar el calce de los regueros La Braña y La Raíz, en Cangas. D’esta forma, cúmplese una demanda vieya de la Coordinadora Ecoloxista y los vecinos de Xichón.
 
El proyeutu de la CHC busca restaurar el calce de La Braña y La Raíz, afeutaos poles escombreres del grupu Perfecto-Riotorno esplotaes por Antacitas de Guillón. D’esta forma, pretende “recuperar la funcionalidá xeomorfolóxica y ecolóxica de los dos regatos con un movimiento mínimu d’escombros de 800 metros y retirar los residuos depositaos nos calces pa recuperar les irregularidaes ambientales numberoses que padecen tres ser esplotaes y abandonaes les explotaciones citaes del valle de Xichón, en plenu Parque Natural de les Fontes del Narcea, Degaña y Ibias”, según espliquen dende la Coordinadora Ecoloxista d’Asturies. Esta noticia foi perbién recibida por esti coleutivu y polos vecinos de la zona yá que llega “depués de más de diez años de denuncies” pola situación de “abandonu, peligru y contaminación que suponen les esplotaciones mineres antigües del valle de Xichón”.
 
D’esta forma, “va enmendase en parte’l desastre fechu pola empresa a cuenta de los impuestos del Estáu, non de los fondos de la empresa minera”, afirmen los ecoloxistes, que nun escaecen la situación llaceriosa d’otres esplotaciones de la zona. “Tamos esperando tovía a que’l Principáu nos informe, como autoridá competente, si xestionó la devolución de los importes recibíos poles empreses pa les restauraciones nun feches o si procedió a espropiar los terrenos degradaos del espaciu protexíu pa la so restauración”, añaden dende la Coordinadora, coleutivu que solicita al Gobiernu y al Institutu de Reestructuración de Zones Mineres que comprueben si hubo “falta d’aplicación por parte de los organismos responsables de vixilar los fechos denunciaos dende l’añu 2000, en vista de que la empresa cobró por restaurar y dexólo too abandonao y contaminao”.