La Coordinadora Ecoloxista denuncia la presencia de dos basureros illegales en Cabu Peñes

|

La esistencia de dos basureros illegales na redolada del Cabu Peñes esmolez a la Coordinadora Ecoloxista d’Asturies. El coleutivu denunció esta situación al Conceyu de Gozón, al que reclama la retirada inmediata de los residuos.
 
Estos basureros asitiénse en Ferreros y Llumeres, nos acantilaos, dientro del Paisaxe Protexíu del Cabu Peñes, Llugar de Importancia Comunitaria (LIC), Zona d’Especial Proteición pa les Aves (ZEPA) y parte de la Rede Europea de Espacios Protexíos-Rede Natura 2000. "Nun se pue permitir que nun espaciu protexíu, nun llugar de la valía ambiental y paisaxística como la del Cabu Peñes, haya dos basureros nos acantilaos con toda clase de residuos, col impauto visual que supón pal segundu llugar más visitáu d’Asturies", dicen los ecoloxistes. Ün d’ellos ta pegáu a un mirador, polo que ye fácilmente apreciable pa los turistes y asturianos que s’averen al puntu más septentrional del país.
 
Dende la Coordinadora esixen al Conceyu de Gozón que proceda a la retirada inmediata de los residuos, que señalice les zones con carteles que recuerden la prohibición de tirar basures nel llugar y que s’investiguen los fechos denunciaos pa dar coles persones responsables pa que se-yos aplique les multes qu’establez la ordenanza de llimpieza de Gozón.

Contador Estadistiques