La Coordinadora asegura que’l Plan de Residuos 2014-2024, qu’inclúi la incineradora, “ye’l peor posible”

|

Esti xueves espublizóse nel BOPA’l Plan Estratéxicu de Residuos del Principáu d’Asturies 2014-2022, anunciáu la selmana pasada. “Si yera malo, la llectura del testu failu tovía peor”, aseguren denden la Coordinadora Ecoloxista d'Asturies.

El Plan, que recupera la incineradora, anque d’un tamañu tovía menor, autorízase, según la versión de los ecoloxistes, “ensin cumplir el tramite llegal de responder a les centenares d’alegaciones presentaes, d’alcuerdu a la Llei 30/1992, de 26 de payares, de réxime xurídicu de les alministraciones públiques y del procedimientu alministrativu común”, ensin tornar a tramitar la so consulta y cola ausencia d’un estudiu económicu financieru “que garantice la so viabilidá”. “Hai que recordar qu’estes deficiencias notables faenlu inviable y de manera nidia illegal”, espliquen dende la Coordinadora Ecoloxista, que destaca “la priesa que tien el PSOE por aprobalu a pesar del so impautu evidente na salú y na economía domestica y municipal” al proponer como solución única “incinerar más en dos llugares diferentes y xubir las tases. Pa nada pretenden lo que marca la normativa, que ye reducir los residuos y aumentar la reutilización y el reciclaxe”.

Ún de los fechos más destacaos d’esti Plan nuevu con respeuto al anterior ye’l caltenimientu de la incineradora nes instalaciones de Coxersa, anque d’un tamañu menor, al pasar de tener una capacidá de 340.000 tonelaes de residuos al añu –proyeutu incluyíu nun plan urbanísticu pal desarrollu del área de tratamientu de residuos que valtó’l Tribunal Superior de Xusticia d’Asturies y que’l Gobiernu ta acabante de recurrir énte’l Supremu– a 310.000 –l’inicial del PSOE yera de 450.000 tonelaes–. A esta cantidá, habría que suma-y la quema de 51.000 tonelaes en forma de combustible na cementera de Carreño. “Renúnciase a la reducción, a la reutilización y al reciclaxe, porque ta nidio que depués de quemar 361.000 tonelaes, poco va queda-yos para reciclar –la cantidá de residuos que se xeneren al añu ta al rodiu de les 490.000 tonelaes–”, apunten los ecoloxistes, qu’anuncien que van siguir cola llucha pa paralizar el Plan socialista, “el peor posible”.

 

Contador Estadistiques