La contaminación del aire por partícules nun mengua n'Asturies

La Coordinadora Ecoloxista insiste na so crítica a les alministraciones énte la falta de soluciones.

La organización lleva años controlando los índices de contaminación del aire por partícules de la zona centru del país, que suelen superar con muncha diferencia los valores máximos esixidos pola Organización Mundial de la Salú (OMS). Ayeri, cola ausencia de lluvia, volvieron a ser esmolecientes.

"La OMS estableció nel 2005 unos valores llende pa partícules PM10 entovía más restrictivos que los vixentes na Xunión Europea, nes sos Guíes de Calidá del Aire. Asina, mientres España considera un valor llende'l promediu añal de 40 µg/m^3, la OMS establezlo en 20 µg/m³", esplica la Coordinadora Ecoloxista d'Asturies. Asina, Avilés rexistró picos del 480 µg/m³ de PM10, Llangréu de 184, Gozón de 151, Xixón de 133 y Castrillón de 99. Unos valores que "dan una idea de la gravísima situación vivida".

"Tamos falando de valores fuera de toda lóxica n'estaciones ubicaes n'entornos urbanos que superen de forma amplia lo que recomienden los científicos como valores razonables, contaminación que tán padeciendo los vecinos del área central asturiana col silenciu y complicidá de les alministraciones responsables", continúen los ecoloxistes, que recuerden qu'esta zona del país ye "la única d'España que supera tolos días el valor mínimu de proteición a la salú en contaminación del aire por partícules".

Aumenta'l riesgu d'enfermedaes cardiovasculares y respiratories

La contaminación en partícules PM10 ta asociada "a l'apaición y l'agravamientu de múltiples patoloxíes", alvierte la Coordinadora Ecoloxista d'Asturies, yá que les partícules "pueden entrar nel sistema respiratoriu, llegando y apegándose nos alvéolos, impidiendo un intercambiu afayadizu d'oxíxenu ente los pulmones y la sangre". La esposición crónica a las partícules "aumenta'l riesgu d'enfermedaes cardiovasculares y respiratories, asina como de cáncer de pulmón", añade.

"Nun se pue siguir ocultando a la población la fuerte contaminación que carez", afirmen los ecoloxistes, que demanden a les alministraciones la busca de "soluciones definitives".

 Semeya de Roberto García CC BY 2.0