Selmana de les Lletres Asturianes

La Conseyería d'Educación ta refugando la inclusión del B2 d’asturianu nel rexistru personal de formación de los docentes

|
Espera entrada al B2 d'asturianu

SUATEA denuncia la situación que tán viviendo dellos maestros que resultaron aptos na prueba de certificación de Llingua Asturiana adaptaes al Marcu Común Européu de Referencia pa les Llingües de nivel intermediu B2 celebrada l'añu pasáu. Depués de solicitar la inclusión d’esta titulación nel so rexistru personal de formación permanente recibieron una negativa de la Conseyería d’Educación.

“Incluyir les nueves titulaciones nesti rexistru tien importantes efectos alministrativos”, esplica’l sindicatu educativu, que cita’l “reconocimientu de méritos pa oposiciones, concursu de tresllaos y complementu salarial de formación permanente”. Pero la respuesta atopada al facer el trámite ye la desestimación del so pidimientu al “nun contar cola documentación requerida pola normativa vixente, a saber, un títulu oficial de les Escueles Oficiales d'Idiomes o un resguardu d'elli”.

“Ye la Conseyería d'Educación la que convoca, ellabora, alministra, evalúa y certifica estes pruebes de competencia llingüística sometíes a la normativa europea, pero paradóxicamente los sos certificaos conviértense en papel moyao al nun poder valoralos en condiciones d'igualdá coles certificaciones d'otres llingües del Marcu Européu”, denuncia’l Sindicatu Unitariu Autónomu de Trabayadores de la Enseñanza d’Asturies (SUATEA). “Nun ye de recibu crear títulos ensin cobertura reglamentaria que garantice la so valoración”, añade al tiempu que señala qu’esta situación “rescampla'l despreciu manteníu nel tiempu col que trata l’Alministración asturiana al interés, la ilusión y el compromisu de munches persones asturianes, tamién del profesoráu, cola llingua asturiana. Ye más, vulnera los derechos llingüísticos fundamentales recoyíos na nuestra llexislación, nos trataos internacionales y específicamente les recomendaciones de la Carta Europea de les Llingües Minoritaries. Demuestra tamién la falta de procuru y dilixencia de l'Alministración a la hora de procurar seguridá xurídica a les sos actuaciones”.

Al respueto, recuerda que dalgo asemeyao asocede “colos títulos d'Espertu y Especialista en Llingua Asturiana otorgaos pola Universidá d'Uviéu”, que “pola so duración equivaldríen a los actuales títulos de máster y que tampoco son reconocíos con esti nivel”. Por too ello, SUATEA demanda a Educación “la cobertura normativa afayadiza pa que los títulos de Llingua Asturiana daos por ella (Conseyería Educación y Universidá d'Uviéu) seyan valoraos en condiciones d'igualdá colos de les otres llingües”, la “creación de la especialidá de Llingua Asturiana y Gallego-asturianu” y la “enseñanza de Llingua Asturiana y Gallego-Asturianu en tolos niveles educativos (Escueles Oficiales d'Idiomes tamién)”.

Na semeya, aspirantes a la prueba de certificación de Llingua Asturiana de nivel intermediu B2 esperen a la puerta de la Facultá de Formación del Profesoráu y Educación de la Universidá d'Uviéu pa facer l'esame escritu nel pasáu mes d'ochobre.

Contador Estadistiques