La conseyera de Pesca niégase a sacar sable de Cuideiru

La Conseyera de Mediu Rural y Pesca, Servanda García, reunióse ayeri cola Alcaldesa de Castrillón, Angela Vallina, pa tratar la polémica entamada pola Dirección Xeneral de Costes, que propunxo utilizar arena d'un bancu d'enfrente del cabu Vidiu, en Cuideiru, pa rellenar los sableros de L'Espartal y San Xuan de Nieva, en Castrillón, d'au la mar llevó bien d'arena.
La entrevista pidiérela l'alcaldesa de Castrillón, onde gobierna'l pautu IX-PSOE, pa pidi-y a la conseyera que mediare énte l'Ayuntamientu de Cuideiru.

Sicasí, la conseyera, lloñe d'ofrecese a negociar con Cuideiru, anunció n'acabando la entrevista que nun ta d'alcuerdu col plan de sacar el sable del Cabu Vidiu pol dañu qu'ello diba facer a los recursos de sardina y calamar, entendiendo que tienen d'estudiase alternatives que garanticen el rellenu d'arena en l'Arena y Salinas pero ensin arriesgar los recursos pesqueros y naturales. La Conseyería de Mediu Rural y Pesca ofreciose a ser mediadora nesti problema, anque declaró qu'hasta agora naide nun los llamare, ufiertando la Conseyera l'inventariu d'afloramientos arenosos del que dispón la Dirección Xeneral de Costes como documentu nel qu'atopar llugares alternativos de los que sacar el sable que faiga falta, alternativa que yá negare Costes porque diz que diba retrasar muncho la obra.


N'Asturies.com yá faléremos d'esti proyectu, al que s'opunxeron dafechu dende'l conceyu de Cuideiru, en cuantes que la saca de los 545.000 mts3 d'arena que se precisaben pa la obra podía afectar mui seriamente al ecosistema del Cabu Vidiu, dañando enforma los recursos pesqueros del llugar, d'au sal la mitada del calamar y bien de la sardina que se pesca en Cuideiru.
N'agostu mandóse parar la obra poles protestes de Cuideiru, y Costes ufiertó entós sacar el sable de les dunes de l'Espartal, espaciu protexíu que precísamente se trataba de protexer col rellenu de la playa de San Xuan. Naide nun quedó conforme cola alternativa, entrando la situación nun puntu muertu que dura hasta agora, produciéndose namás movimientos menores como cuando la otra selmana l'alcaldesa de Castrillón mandó trancar el mirador de la playa de San Xuan porque aragayare tola arena en que se tenía, quedando los cimientos al aire.

El plan de Costes ye bien agresivu pa col fondu marinu, del que les bombes van tar surniando arena y tolo qu'atropen d'una poza d'au sal cerca de la mitada del calamar que se pesca na zona. L'actuación pa rexenerar les playes contaba con un presupuestu de 11 millones d'euros, de los que'l 85 por ciento veníen de los fondos de cohesión de la UE y el 15% del Ministeriu de Medio Ambiente, titular de la Demarcación de Costes.