La Carisa pue tener estructures prerromanes

Les escavaciones en Picu Curiel.los nun aparen
de dar resultaos interesantes. Si va dos meses los arqueólogos encargaos
presentaron los resultaos de la primer campaña d'escavaciones en La Carisa, que ye
hasta agora'l campamentu militar romanu a más metros sobre'l nivel del
mar y ún de los meyor conservaos d'Europa, ayeri un periódicu asturianu recoyía
afirmaciones del equipu d'arqueólogos nes que reconocíen que
teníen atopada una estructura non xeolóxica perbaxo de lo que
ye'l campamentu romanu, lo qu'abre la puerte a una posible ocupación
prerromana. Amás d'esto, cerca de lo que ye'l campamentu de La Carisa,
los arqueólogos tienen atopaos restos d'otru yacimientu,
posíblemente prerromanu, que cuenten con escavar l'añu qu'entra.
El yacimientu ta a un kilómetru en llinia recta dende la Carisa y consta
de dos torres y un fosu que pasa ente elles.

Yá nos años setenta del sieglu pasáu, J.M. González, el primer arqueólogu que dio anuncia de los restos del Picu Curiel.los, dixo qu'estos podíen rellacionase con poblaciones indíxenes que practicaren la ganadería treshumante, tesis que tamién defendió'l desapaecíu José Luis Maya. L'atribución del yacimientu a los romanos quito-yos valir a les tesis d'estos dos padres de l'arqueoloxía asturiana, pero l'apaición d'estructures prerromanes a 1.700 metros d'altor tamién pue falar d'un posible escenariu de batalla ente pueblos astures y romanos.