La banda ancha llega a Allande

Los pueblos de Berducedo y Tremao nel conceyu d'Allande son los primeros en contar con sistema d'accesu a Internet a traviés d'enllaces per satélite y redes inalámbricas dientro del programa européu Cyberal d'accesu a les nueves tecnoloxíes nes zones rurales.

Esti ye'l resultáu concretu de les actuaciones previstes y aprobaes dientro de la Iniciativa Interreg III-B-Sudoe y que ta cofinanciada con fondos estructurales del FEDER. El so desarrollu supondrá un costu total de 1.049.530 euros. D'estes perres tan previstes p'Asturies unes 528.568 euros de les cuáles sedrán aportaes pol FEDER nun 75% y el restu van corresponder financiales al Gobiernu d'Asturies.

Esta iniciativa comunitaria tien como finalidá meyorar enforma l'accesu a Internet de les zones rurales, superando les llimitaciones d'anguaño que tienen pol emplegu de la telefonía per radio, que na práctica fae-yos mui difícil y caro l'accesu a la rede. El proyectu incluye la esperimentación con tecnoloxía satélite y ADSL en cinco localidaes de la rexón francesa de Lot y nueve localidaes asturianes. Les siguientes a poder disfrutar d'esti serviciu sedrán Navelgas (Tinéu), Posada de Rengos (Cangas del Narcea) y Porrúa (Llanes).

Los usuarios d'esti serviciu tendrán unes reducciones, que sedrá satisfechu a la empresa Telecable axudicataria d'esti proyectu, por parte de la Conseyería de Mediu Rural y Pesca.