La banca na internet nun gana perres

Esti añu, los bancos que trabayen solo na rede nel territoriu español tuvieron un 10,7% más de perda que´l añu 2.001. Los númberos falen ellos solos: 83,75 millones d´euros de perda nel 2002 en comparanza colos 75,63 millones del 2001. Esti empeoramientu débese mayormente al fracasu de los bancos Activo Bank (filial na rede de Bancu Sabadell) y Inversis, en cuantes que dambos ficieron un balance permalu con perdes de más d´un 70% caún. El bancu na rede del BBVA, Uno-e tamién algamó un resultáu negativu superando los 24 millones d´euros de pasivu. Asina'l panorama ye percomplicáu porque los marxes de beneficiu son pequenos y la xente tien munchu mieu a meter los sos aforros en bancos que nun dan la imaxe de confianza y seguranza que dan les oficines na cai. Con too y con ello l'añu 2002 nun pintó mal pa toos. Los bancos electrónicos Patagon (SCH) y Bancopopular-e (Bancu Popular) sí que tuvieron resultaos positivos per primer vegada na so hestoria, anque tampoco apurrieron resultaos d'espatarrar. Patagon ganó 446.000 euros mientres que Bancopopular-e presentó un beneficiu de 672.000 euros. Otramiente, y pa facese una idega del volume que mueve anguaño la e-banca nel estáu diremos que'l bancu na rede que tien más activos xestionaos ye Patagon, con 2.445 millones d´euros. Tres d'elli vien Uno-e con 1.343 millones d´euros. Pel llau de créitos a clientes Bancopopular-e ye´l lider con 227 millones d´euros.