L-R y Cerezal, nel primer avance del Añu d'Asturies nel Festival Interceltique de Lorient

El LI Festival Interceltique de Lorient yá ta en marcha. La organización del multitudinariu certame alredor de la música de raigañu celta que se celebra n’agostu dio esti vienres primer adelantu de programación, nel que tán Cerezal y L-R, amás de Silvia Quesada y José Manuel Tejedor na iniciativa ‘Celtic Odysée’ xunto a artistes d'otres naciones celtes.

Flook, Cécile Corbel, Noon, Miossec, Gaëtan Roussel, Karan Casey…, son dalgunos de los nomes confirmaos pal Interceltique, nel qu’Asturies va tener una presencia importante nel añu nel que protagoniza’l festival. L-R, el 5 d’agostu xunto con Plantec, y Cerezal, el 11 y el 13, son les primeres formaciones de la delegación asturiana de les que s’anuncia conciertu n’An Oriant.

Amás la cantante Silvia Quesada y el gaiteru José Manuel Tejedor apaecen nes mosaicu d’artistes de delles naciones celtes que se presenten na actividá ‘Celtic Odysée’ prevista pal 12 y 13. Nun van ser los únicos que se van desplazar a Breizh esti branu pa representar a Asturies nuna edición histórica pa país que se va desendolcar del 5 al 14 d’agostu.

Les entraes pa los primeros espectáculos confirmaos van ponese a la venta mañana a les 11 hores.

Conciertu n’El Franco

Leticia Baselgas y Rubén Bada, L-R, va tocar mañana nel Auditorio As Quintas d’A Caridá. L’actuación ta programada pa les 21 hores y la entrada tien un preciu de 5 euros.