L’Avilés presenta en Cartagonova la so candidatura al ascensu (1-3)

El Real Avilés venció con autoridá al Cartagena por 1-3, un resultáu que permite a los d’Uribe afrontar la vuelta con tranquilidá. Mentes, el Caudal perdió en casa col Atlético B (0-1) y tendrá que remontar en Madrid pa caltener la categoría.

 

Un gol madrugador de Nacho López, tres una asistencia xenial d’Álex Arias, dexó nidio a l’afición local que los d’Uribe nun plantegaben la eliminatoria de forma conservadora. L’Avilés dominaba al Cartagena de Tevenet y, tres el descansu, llegaría’l segundu de la bota d’Omar. Recortaría distancies Megías seis minutos depués, pero los blanquiazules –ayeri de granate– nun perdieron la esencia del so xuegu y dexaron frío Cartagonova col terceru, obra de Javi Camochu nel minutu 90. El partíu de vuelta nel Suárez Puerta va ser el domingu, a les 18.45 hores, con un preciu de 10 euros pa socios (5, los sub-16) y de 20 euros pa públicu (10, los sub-16).

 

Si too yeren cares allegres pela mañana na espedición avilesina y los más de cien aficionaos desplazaos a tierres murcianes, en Mieres foi tolo contrario. Un error de Bielsa nun disparu de Samu, segundos depués de facer una bona parada nuna contra del Atlético B, dexa al Caudal nuna situación complicada. Asina, los de Tomé han de viaxar a Majadahonda cola necesidá de remontar el domingu (18 hores) un 0-1 si quieren continuar un añu más na categoría de bronce del fútbol estatal, un retu complicáu pero asumible por un equipu qu’amosó la so capacidá de reaición nel tramu final de la lliga regular.

 

El Lealtad pierde en Puertollano (1-0)

 

Na llucha pol ascensu a Segunda División B, el Lealtad nun pudo trayer un resultáu positivu de La Mancha al recibir un tantu nel tramu final de partíu y deberá intentar dar la vuelta a la eliminatoria en Les Caleyes énte la so afición. Los maliayos aguantaron al potente Puertollano mientres tol partíu y namái un tanto de Rubén Moreno nel minutu 84 fixo que la derrota cayera del llau prietu. La fecha pa la remontada, que daría plaza al Lealtad la próxima temporada en Segunda B, ye’l domingu a les 17 hores.

 

L’equipu de Tercera qu’algamó un meyor resultáu foi l’Unión Popular de Langreo, tres ganar 0-1 al Atlético Monzón. Un gol de Carli nel minutu 86 finó’l cola cigua de los llangreanos nes eliminatories pol ascensu con esti formatu y el domingu, a les 18 hores, van tener la posibilidá de certificar el pase a la segunda ronda. El preciu pa los socios ye de 5 euros, siendo de 12 pal públicu (5, los sub-25), mentes que los menores de 17 años tienen entrada gratis pa un partíu nel que la direutiva quier enllenar d’azulgrana Ganzábal. Pa ello, ufierta la camiseta oficial d’esti añu por 20 euros (talles L y XL).

 

Otru campu onde s’espera una ambiente espectacular ye en La Cruz esti domingu (17 hores) tres el bon resultáu de los de Nacho Cabo n’Águilas (1-1). L’UC Ceares debutaba, 68 años depués de la so fundación, nuna fase d’ascensu a Segunda División B y sumaban un valiosu empate a un gol nun campu bien complicáu como El Rubial. L’Águilas FC llevó’l dominiu del partíu, pero ensin crear ocasiones nidies énte la portería defendida ayeri por Pablo. El tantu del goleador llocal Ginés Meca nel minutu 65 nun cambiu’l guión de los xixoneses, que consiguieron l’empate nel 88 por medio de Pablo Martínez, tantu que pue ser clave na eliminatoria pol valor doble de los goles fuera de casa. Pal partíu de vuelta los socios han de pagar 5 euros, siendo’l preciu de públicu l’habitual en lliga: 12 euros.

 

Más complicao va tenelo’l Praviano, que perdió en casa 0-1 énte’l Socuéllamos. Los de Xiel nun tuvieron acertaos énte la portería contraria y el gol de Javi Bolo nel minutu 15 fixo qu’entraren pronto les prieses. Sicasí, dada la imaxe dada pol equipu asturianu énte los manchegos, la eliminatoria ta tovía abierta. El partíu decisivu va tener llugar el domingu a les 19 hores nel Paquito Jiménez.