L’Archivu de la Música Tradicional recupera les grabaciones feches por Schindler n’Asturies nel 1932

El musicólogu alemán Franz Schlindler foi la primer persona que fixo grabaciones en trabayu de campu n’Asturies. L’Archivu de Música Tradicional recuperó esta xoya compuesta por 33 documentos sonoros rexistraos en Llanes y Cabrales nel 1932.
 
Schindler desplazóse n’aquella dómina a la Península Ibérica tres un encargu de la estauxunidense Columbia University in the City of New York nel 1928. Cola so grabadora Fairchild Aerial Company tuvo grabando per dellos llugares como Santander, Zamora, Miranda do Douro, Ávila, Cáceres y Badajoz, parando n’Asturies nel 1932, en concreto nos conceyos de Llanes y Cabrales. El resultáu final foron 160 discos d’aluminiu con más de diez hores de grabación nel que s’incluyíen 33 documentos sonoros asturianos, un total de 21 temes, según esplica Fernando Ornosa, responsable del Archivu de Música Tradicional del Muséu del Pueblu d’Asturies, que negoció cola castellana Fundación Joaquín Díaz la incorporación d’estos documentos sonoros a los fondos del muséu xixonés.
 
“Schindler fixo les primeres grabaciones realizaes en trabayu de campu n’Asturies. Rexistra un soníu hasta’l momentu nunca grabáu, el del pueblu, yá que les grabaciones anteriores, feches en discos de cera o de pizarra, yeren d’intérpretes reconocíos, como’l Gaiteru Llibardón o La Busdonga”, destaca Ornosa. Asina, el musicólogu alemán grabó a persones normales de pueblos de Llanes y Cabrales, xente desconocío, como ye’l casu de José Noriega, que más tarde ganaría fama nel país. “Estes grabaciones suponen una radiografía espectacular de la música asturiana de la dómina”, resalta’l responsable del Archivu de Música Tradicional.
 
Toles grabaciones de Schindler terminaron na Residencia de Estudiantes de Madrid, per onde pasaron grandes personalidaes culturales, pero terminaron perdiéndose col pasu del tiempu. Sicasí, el Centro Etnográfico Joaquín Díaz consiguió “a preciu d’oru” facese col trabayu del alemán na Península Ibérica, ente les que s’incluyíen les grabaciones feches nel país. Les negociaciones d’Ornosa colos responsables d’esta entidá vallisoletana permitieron, “gracies al prestixu del Muséu del Pueblu d’Asturies y del Archivu de la Música Tradicional”, que los 33 documentos asturianos terminaren n’Asturies.
 
Agora, la intención del Archivu ye trabayar con estes grabaciones y documentase bien pa, nun futuru, sacar un llibru-CD similar al qu’asoleyó en setiembre col trabayu d’Alan Lomax. Pa ello, yá tán teniendo conversaciones cola Columbia University, propietaria de los derechos de reproducción. “Ye un procesu complicáu”, apunta Ornosa, que reivindica la importancia del patrimoniu inmaterial pa conservar y difundir la memoria de los asturianos. “Pa ello ye necesario tener dotaciones presupuestaries. Ye la única forma de facese con documentos únicos”, apunta’l responsable del Archivu en referencia a los trabayos de xente como Lomax o Schindler.