Juanín de Mieres y la voz d'un pueblu

Juan Menéndez Muñiz, más conocíu por Juanín de Mieres, morrió esti sábadu día trece a los 97 años d'edá. Asturies perdía asina una de les voces más importantes de la tonada, que munches figures despidieron con bones palabres sobre la so persona, y sobre too sobre'l so arte a la hora de cantar.

Juanín de Mieres nació el 14 d'ochobre de 1905 en Mieres,y anque nunca nun-y enseñaron como se cantaba la tonada asturiana, fízose a fuerza pasar bien d'hores sintiendo a cantantes en Mieres, de los que deprendió'l secretu pa cantar bien, que se resumía como dicía el mesmu en "Tener voz, entonar bien, respirar bien y tener cara". Sicasí, Juanín de Mieres sí qe tuvo alredor la música yá dende bien pequeñu, y ye que dellos de los sos hermanos yeren buenos cantantes y el pá fuera solista nel Orfeón Mineru, nel que dio los primeros pasos. A partir de l'adolescencia Juanín entamó a desenvolver la so afición pola canción asturiana, actuando en bien de teatros, ilesies y romeríes que disfrutaron cola voz del mierense. Con 21 años Juanín conoció a cuatro de les persones de les que más deprendería, ellos yeren "Los Cuatro Ases de la Canción Asturiana". Cuchichi, Botón, Claverol y Miranda representen pal mozu Juanín toa una llección de técnica y estilu, deprendiendo d'ellos cantares y técnica, ayudándo-y a desenvolver un estilu propiu que ganó l'almiración del públicu, que-y punxó'l cargu de "Almirante de la canción asturiana". La carrera discográfica de Juanín de Mieres compónse d'una decena de discos de llarga duración, amás de tener participao na grabación de delles bandes sonores pa películes na década de los 50. Juanín retiróse oficialmente de los escenarios en 1958 con un conciertu nel teatru Capitol de Mieres, anque'l so últimu discu apaeció en 1969. D'entós en p'alantre, l'artista dixo que nun quería cantar más porque nun quería "facer el oso"

Consideráu técnicamente como un barítonu, la voz de Juanín de Mieres caracterizábase por una ser "redonda", ensin estridencies nes partes altes o baxes. El timbre de voz de Juanín nun yera a adaptase la gaita, por eso yera un cantante que xugaba muncho nes partes graves de los cantares, yá que nun tenía que combayar cola tesitura del instrumentu. Ensin dulda que les sos versiones de "A la salida del Sella" o "Arrea carreteru" van mantener vivu'l recuerdu d'una voz pa la historia de la cultura asturiana.