José Ángel Fernández Villa, premiu “buyada purpurina”

El premiu que concede dende va trece años la Coordinadora Ecoloxista d'Asturies a la persona o institución que más faigan pol estropiciu del mediu ambiente asturianu foi esti añu pa José Ángel Fernández Villa, líder del sindicatu mineru SOMA-UGT.

L'acta del premiu destaca la oposición del líder sindical a l'aplicación del Protocolu de Kyoto y a la modernización del parque termoeléctricu asturianu convertiendo les centrales de carbón al consumu de gas menos contaminante, tema pol que'l líder sindical foi noticia delles vegaes esti añu, pero remembra tamién cuestiones como l'apoyu que da a la minería n'abertal, a obres públiques de gran impactu en llugares protexíos como la estación d'esquí en Puirtu Braña (Ayer) o les sos declaraciones al favor de la construcción del embalse de Caliao (Casu). L'acta del xuráu llama l'atención tamién sobre la política de Villa de "marafundiu del presupuestu de los Fondos Mineros n'obres de duldosa utilidá social y altu impactu ambiental, casu de los proyectos d'infraestructura viaria, que camentamos si valen pa face-y más facil l'abandonu de les cuenques en crisis a la población" citando los casos de la Y de Bimenes, túnel del Rañadoiru o l'autovía a Casu.