Jane Godall, premiu Príncipe d'Asturies

El xuráu de los Premios Príncipe d'Asturies ta acabante de concedé-y el premiu Príncipe d'Asturies d'Investigación Científico y Técnico 2003 a la etóloga inglesa Jane Goodall, que considerada la másima representante de la Etoloxía y primer autoridá mundial nel estudiu del chimpancé.

Jane Goodall ñació en Llondres en 1934, y en 1957 llegó a Kenia, onde trabayó col nomáu paleontólogu Louis Leakey, que la empobinó al estudiu del chimpancé, entamando una carrera académica estrada de reconocimientos universitarios y d'otru calter como'l nombramientu de mensaxera de la paz de la ONU.


La concesión del premiu a la bióloga inglesa ta alcontrando'l reconocimientu de tol ambiente científicu y tamién de bien d'organizaciones ecoloxistes, casu de Greenpeace , qu'aprovechó pa felicitar a la premiada y pa denunciar de pasu'l papel de la industria
forestal española na destrucción de los bosques africanos, hábitat de
los chimpancés


Greenpeace diz qu'África pierde tolos años 4,1 millones d'hectáries
de biesca, llegando la
Cuenca del Ríu Congu a deforestase a razón del 0,7% de superficie al añu.

Según lo datos que remana Greenpeace, África ye'l mayor furnidor
de madera tropical a España, con Camerún y Costa de Marfil de mayores esportadores. La organización ecoloxista cuenta con que la concesión del premiu valga pa que l'estáu español y les empreses españoles cambien de política respective a la importación de madera y vayan adaptándose a la etiqueta FSC, qu'afita que la madera venga d'esplotaciones madereres xestionaes acordies a criterios de respetu al mediu ambiente.