Iraq ya ye norteamerica pa los inversores

Cola toma de Bagdad pol exércitu d´Estaos Xuníos los inversores ya dan por rematáu el conflictu bélicu y agora entamen a da-yos más importancia a los resultaos empresariales y al escenariu macroeconómicu. El vienres pasáu les bolses pesllaron con moderaes ganancies dientro d´una selmana estrada de baches. Irak ya nun ye centru d´atención principal pa los analistes, y anque dende´l Pentágonu dizse que tovía ye pronto pa dar anuncia del fin de la guerra, los inversores ya tienen descontaos los efectos de la mesma, colo qu'el mercáu torna a centrase no económico dafechu. L´Ibex sigue penriba los 6.400 puntos, mangándose nos 6.442,3 el vienres pasáu. Esti avance del 0,54% del vienres supón un 1,86% na selmana. Sicasí, en xeneral, el pieslle en positivo de les bolses demuestra la bona acoyida del desarrollu del conflictu, en cuantes que les perspectives económiques nun son pa dar munches alegríes.



Ente les estadístiques más señeres ta el bon datu de confianza de la Universidá de Michigan, con 83,2 puntos sobre los 79 que teníen previstos los analistes. Esti datu dio-yos una bona alegría a los inversores, neto que los de les empreses Foundry Networks y Jupiner Networks, que tiraron, xunta´l comportamientu de Wall Street, polos índices europeos. Nel Vieyu Continente les estadístiques del IPC de Francia y España foron del 0,5% y 0,7% respectivamente, siendo nel casu español la xuba interanual de los precios del 3,7% mentantu'l francés ye del 2,6%. La noticia empresarial más señera foi'l 20% más de beneficios d´una de les mayores empreses: General Electric. Pero lo que más confianza-yos dio a los analistes foi'l datu estadísticu de les compres al por menor nos Estaos Xuníos, que con una xuba del 2,1% en marzu, quedaron bien penriba del 0,6% col que se contaba. Esto diz muncho de qu'entovía nun se noten los efectos de la guerra no que ye consumu particular. Esti aparente bon ambiente fizo que´l Ibex se averase a la barrera de los 6.500 puntos. De toles formes dalgunos analistes alvierten de la esaxerada xubía de les bolses nes últimes selmanes y de la probabilidá de que se produza una fuerte corrección técnica.

Los blue chips españoles, que son los valores de gran capitalización bursátil, tuvieron un discretu avance selmanal, rescamplando Jazztel y Tecnocom con unes xubes del 15% y del 12% respectivamente. Los inversores celebraron que Tecnocom mercase un importante paquete accionarial n' Amper, mientres que Jazztel ye un valor mui especulativu y qu'anguaño muevese en valores pequeños nos qu'unos pocos céntimos arriba suponen una xuba porcentual importante. Amadeus, la compañía de reserves de viaxes online, foi ensin dulda un de los valores con más puxu a lo llargo de la selmana, pesllando'l vienres en 4,54 euros per aición, con un avance selmanal penriba´l 3%. Otros valores con selmana mui positiva foron Bankinter, BBVA y SCH. Iberia y Indra nun tuvieron un bon pieslle de selmana (-1,26% y - 2,4% respectivamente) anque pior foi pa Indra y Endesa. El xigante Telefónica tuvo resultaos estremaos coles subes de TPI y de la matriz del grupu y coles cayíes de Telefónica Móviles y de Terra. Nel parqué madrilanu, el volume de negociu sigue baxu, con 1.376 millones d´euros negociaos el vienres pasáu. En resume l'índiz xeneral de la Bolsa de Madrid asistióse nos 666,93 puntos y l' índiz Nuevu Mercáu nos 1.568,4 puntos.


L'euru ya val 1,0756 dólares, con un retrocesu a lo último de la selmana del 0,25%. L'euru tuvo una selmana bastante estable respective a la moneda norteamericana. La renta fixa sigue en caída llibre con una fuerte cayida de los bonos a 10 años. Los futuros sobre´l barril Brent marcaron mínimu nensual con 24,28 dólares. Anque los inversores quieren piesllar el capítulu de la invasión d´Iraq entovia nun se conocen los efectos económicos que va traer y ello ensin contar cómo va afectá-yos a los mercaos la posible inestabilidá política que pueda xenerar l'estropiciu que tan faciendo los Estaos Xuníos en Oriente Mediu. Xunta esto, les empreses nun tienen bonos resultaos y les perspectives macroeconómiques nun son meyores. De fechu Portugal ya ye´l primer país na OCDE en recesión técnica.