Iniciativa pol Asturianu reclama a Carreteres pol incumplimientu de la toponimia en Siero

Nos cartelos nuevos nun se respeta la toponimia de La Pola Siero y d’Uviéu.

Iniciativa pol Asturianu ta acabantes de presentar una reclamación ante la Demarcación de Carreteres del Estáu pa esixir l’usu de la toponimia oficial de La Pola Siero y d’Uviéu na señalética de la nueva glorieta na N-634 nel accesu oeste al Berrón. La organización recuerda que "estes señales incumplen la llexislación vixente sobre los topónimos según recueye’l Decretu 104/2009, de 29 de xunetu, pol que s'afiten los topónimos oficiales del conceyu de Siero. Apaez ‘Pola de Siero’ cuando oficialmente ye ‘La Pola Siero’.

Tamién va "contra lo que recueye’l Decretu 14/2019, de 13 de marzu pol que s’establecen los topónimos oficiales del conceyu d’Uviéu. Nel cartelu figura ‘Oviedo’, cuando tenía qu’apaecer ‘Oviedo/Uviéu’". Nesi sen, apunten que según l’artículu 15 de la Llei 1/1998, de 23 de marzu, d’Usu y Promoción del Asturianu recueye, nel so puntu 1, que "Los topónimos de la Comunidá Autónoma del Principáu d’Asturies tendrán la denominación oficial na so forma tradicional. Cuando un topónimu tenga usu xeneralizáu na so forma tradicional y en castellán, la denominación podrá ser billingüe".

Amás, anima al Conceyu de Siero a participar d’esta reclamación p’adecuar la señalética a lo que ta recoyío nos decretos de toponimia. La toponimia oficial ye vixente nel casu de Siero dende 2009 y nel casu d’Uviéu dende 2019.