Iniciativa pol Asturianu demanda a la Universidá d’Uviéu “sensibilidá col idioma” y l’usu de la toponimia oficial

|
Patiu Edificiu Históricu de la Universidá d'Uviéu

Un Doctor de la Universidá d’Uviéu presentó a la institución una reclamación al detectar nel so títulu un error “col usu de la toponimia oficial” y depués de que la Seición de Doctoráu refugara'l so pidimientu de que’l documentu fora billingüe. Iniciativa pol Asturianu fixo públicu'l so casu y demanda “sensibilidá col idioma”.

Foi’l 17 de marzu cuando, al recoyer el títulu, esta persona, de la que nun se cita’l nome, atopó que “nel mesmu apaecen los topónimos ‘Oviedo’ y ‘Gijón’, cuando les formes oficiales son Oviedo/Uviéu y Gijón/Xixón”, apunta na reclamación presentada nel Rexistru de la universidá a l’atención del rector, Ignacio Villaverde. “Nel so momentu reclamé tamién que’l títulu fuera billingüe, teniendo en cuenta’l reglamentu de la Universidá d’Uviéu, artículu 6.2 y 6.3”, añadió, un pidimientu qu’atopó la negativa de la Seición de Doctoráu.

Énte esta situación, solicita “que se corrixa’l mio títulu y se m’entregue de nuevo una copia; que se revise la respuesta sobre la posibilidá de tener el títulu en formatu billingüe y se realice de forma billingüe (asturianu/castellán) la redacción del testu del títulu; que se revise’l procedimientu pa que la toponimia oficial apaeza por defectu en tolos títulos qu’espida la Universidá d’Uviéu”. “Iniciativa pol Asturianu solidarízase col estudiante y reclama la igualdá de drechos, amparándose na lexislación vixente”, apunta al respeuto’l coleutivu, qu’entiende que ye importante que la institución “tenga sensibilidá col idioma y faiga un usu normal ciñéndose a la toponimia oficial”.

Esta circunstacia dase precisamente nel mes nel que la Universidá d’Uviéu, tres el cambiu de rector, dexare d’emplegar de manera progresiva’l logu trillingüe de la institución pa emplegar namái un monollingüe en castellán. La escusa dada por Villaverde pa dexar fuera l’asturianu y l’inglés ye que la imaxe baxo’l mandatu de Santiago García Granda nun ta recoyida nel manual d’identidá corporativa, que data del 2013.

Contador Estadistiques