Iniciativa pol Asturianu celebra la cada vez mayor presencia del idioma nos puestos de la FIDMA

La llingua asturiana tien presencia nesta edición de la Feria Internacional de Muestres d’Asturies (FIDMA) nel pabellón del Gobiernu y nos puestos de los conceyos de Xixón, Mieres y Llangréu, ente otros. La nota negativa ponla la Universidá d’Uviéu, que desanicia’l nome n’asturianu de la institución nel so stand.

Estos díes, y hasta’l 22, ta celebrandose nel recintu ferial de Xixón la FIDMA. La gran cita comercial asturiana torna depués del parón del añu pasáu pola pandemia de COVID-19 con midíes de seguranza como la reducción del aforu un 50 por cientu o la distribución de los puestos pa poner la mayor parte d’ellos, un 85 por cientu del total, n’espacios esteriores.

Nesta sesentena cuarta edición rescampla la presencia del asturianu en dellos puestos y pabellones, asina como la visibilización del idioma en campañes publicitaries y n’otres empreses presentes nel llugar. “Ye importante ver como s’afita esi usu del asturianu nestos espacios”, celebra Iniciativa pol Asturianu, que, por contra, llamenta’l retroceso nel usu institucional del idioma na Universidá d’Uviéu.

“Resulta incomprensible ver pasos atrás na normalización social del asturianu. L’espaciu de la Universidá d’Uviéu llevaba varios años cuntando cola denominación de la institución n’asturianu y yera un tema normalizáu y afitáu”, esplica la organización, cuestión que pudieron treslladar ayeri a Ignacio Villaverde na so visita xunto col conseyeru de Ciencia, Innovación y Universidá, Borja Sánchez García, al puestu qu’Iniciativa pol Asturianu comparte con nueve empreses qu’usen l’asturianu nos sos productos o servicios.

Inaciu Galán, vocal de Rellaciones Institucionales, aldericó col rector sobre’l papel de la universidá nel usu del asturianu y sobre la oficialidá, y ufiertó-y asesoramientu pa la presencia del asturianu en campañes, publicaciones y trabayos como’l de la FIDMA “pa qu’estes situaciones nun vuelvan a ocurrir y que l’asturianu tea al mesmu nivel que’l castellán”.

Na semeya superior, puestu de la Universidá d'Uviéu esti añu na FIDMA. Na inferior, nel 2019, última celebrada. Vese como'l nome n'asturianu atapóse con un cartelu.