Iniciativa considera “inalmisible” l’ausencia del asturianu n’Infantil, una etapa educativa “fundamental”

|
Lydia Espina

“Vamos quedar ensin oficialidá y tamién ensin l’asignatura d’asturianu na etapa Infantil”, denuncia Iniciativa pol Asturianu, que considera “inalmisible” l’ausencia del idioma nel currículu d’esta etapa educativa “fundamental pa garantizar la tresmisión xeneracional”. La decisión de la conseyera Lydia Espina “contravién la Llei d’Usu”, recuerda.

La responsable d’Educación facía esta anuncia ayeri na Xunta Xeneral, lo que provocó sorpresa por ser una decisión contraria a la llegalidá. “¿Cómo puede ser que se tean dando pasos atrás col asturianu?”, entrúguense dende Iniciativa pol Asturianu, que recuerda que la presencia del idioma nel currículu foi un compromisu del Gobiernu anterior

“Ye mui difícil d’entender que la Conseyería d’Educación d’un Gobiernu que defende la oficialidá prescinda de la llingua asturiana y del gallego-asturianu nel currículum d’Educación Infantil, qu’amás da pasos atrás na presencia de los idiomes nel sistema educativu”, rescampló Iván Llera, presidente del coleutivu, que recuerda que “contravién la Llei d’Usu”. “Supón una nueva vulneración de los derechos de les persones que falamos asturianu, polo que vamos solicitar un conceyu urxente cola conseyera pa tresllada-y la nuesa esmolición pola situación del asturianu nel sistema educativu”, añadió.

Na imaxe, Espina ayeri na Xunta Xeneral. Semeya obra d'Armando Álvarez.

Contador Estadistiques