Indicadores negativos

Nos últimos díes
espublizáronse delles estadístiques económiques nes que la
situación d´Asturies nun pintaba mui bien. Dellos de los datos
más señeros nestes estadístiques son la presencia
d´empreses nel país, la situación de les families
dientru´l mercáu llaboral, el preciu del tarrén
agrícola y la situación de la inmigración n´Asturies.




Según una d'estes estadístiques, el Directoriu Central
d'Empreses (DIRCE) del INE namas tienen sede n´Asturies el 2,31% de toles
empreses del Estáu Español. Madrid, Andalucía y
Cataluña son les zones onde s´asistien mayor númberu de
proyeutos empresariales, mientres que de les que-y toquen a Asturies les
más d'elles operen nel sector servicios.



Pela so parte, Caixa Catalunya espublizó un estudiu sobre la
renta familiar n'España nel que s'asoleya qu'hai 140.000 families
asturianes nes que nun trabaya miembru nengún. Esto supón
que´l 40% de les families del país o bien son inactives o ye que
tan en paru dafechu. Un datu alarmante que diz muncho del estáu de
deterioru del mercáu llaboral astur.



Nel sector agrariu, el Ministeriu d'Agricultura dio los datos del preciu
del suelu agrícila, destacando'l datu de la xuba del preciu del
tarrén n´Asturies, con una medra nel últimu añu del
11,5%. El preciu del suelu pa esplotación agrícola
n´Asturies medró bien penriba la media del Estáu, que foi
del 5,9%. Asina Asturies ye cabezalera na llista del encarecimientu del
terrén xunta Murcia, Baleares, Navarra y Castiella La Mancha. Los
terrenos dedicaos a llimoneros y a güerta tovieron les xubes más
señeres nesti períodu: 28,7% y 20,3% respectivamente. De fechu
dende´l añu 1997 hai un procesu perimportante d'encarecimientu del
preciu del terrén agrícola, especialmente´l dedicáu a
regadíos y a cultivos.