Ideas, formación lliderada por Juan Morales, va mostrar el so apoyu a la llingua asturiana

Juan Morales, candidatu d’Independientes de Asturias (Ideas), va facer una rueda de prensa conxunta col CAO esti miércoles nel que va mostrar el so apoyu al asturianu. Dende’l coleutivu s’espera que se posicione a favor de la oficialidá.
 
La plataforma cívica Conceyu Abiertu pola Oficialidá (CAO) tien feches delles reuniones con Morales, políticu que coló del PP nel 2009 y que llidera la formación Ideas, qu’agrupa a delles grupos políticos independientes de carauter llocal, nes que l’ex parlamentariu na Xunta Xeneral mostróse receptivu a les demandes del coleutivu. Mañana, miércoles, a les 17 hores nel ‘Conceyu Abiertu’ del Llar Solidariu, Morales y Carlos Pulgar, del CAO, van facer una rueda de prensa na que’l candidatu d’Ideas a la presidencia d’Asturies podría dar el so apoyu a la reconocencia del asturianu como llingua oficial na reforma próxima del Estatutu.
 
D’esta forma, Ideas sumaríase al conxuntu de partíos asturianos que tán a favor de que l'asturianu tenga’l marcu llegal que se merez. El CAO tamién mantuvo conversaciones con Foro Asturias, anque la formación lliderada por Francisco Álvarez-Cascos tovía nun se posicionó sobre l’asuntu.