Ibán Mayo, el meyor nes ramples d’El Naranco

El corredor vascu del equipu Euskaltel foi'l ganador de la clásica Xubida del Naranco, na que ganó faciendo una demostración de fuercia nos trés kilómetros últimos, alcanzando a los cinco fugaos que protagonizaron la clásica asturiana. Los corredores asturianos tuvieron mui revolvinos, con Samuel Sánchez llegando cuartu a la meta del monte uvieín y una interesante participación d'asturianos na selección española d'aficionaos, con Mario Sánchez José Miguel Oblanca y Iván Álvarez entrando en meta.

La llucha foi mui dura na 38 edición de la gran clásica del ciclismu asturianu, entamando la carrera mui fuerte dende que se salió de Llugones. Con namás 14 kilómetros de carrera fechos saltaba la escapada bona, iguándose un garapiellu de cinco corredores con Chente García Acosta Pablo Lastras, Adolfo García Quesada, Moisés Dueñas y Isidro Nozal que tuvieron una ventaya máxima de cerca de 4 minutos al pasu per Casu. L'equipu Euskaltel, que xugaba pol trunfu final, entamó entós una caza que remató na mesma fastera del Naranco col ataque final d'Iban Mayo, que nun alcontró oposición pa llegar el primeru a la llinia de meta.

La carrera d'ayeri foi un prólogu a la selmana grande del ciclismu nel país, y ye que güei entama la Vuelta Ciclista a Asturies. Los corredores salen a les once y media de la estación de la Renfe d'Uviéu pa facer la etapa en llinia hasta Llanes, pasando pela Pola Siero, l'Infiestu, Colunga, Ribeseya y Cangues d'Onís. Los altos más importantes nesta primer xornada van ser el de la Robellada y el de La Cuesta, dambos de tercer categoría, y l'altu La Llama, de segunda.