IAS presentó'l manifiestu de sofitu a les sos candidatures

Izquierda Asturiana, partíu que se presenta por primer vegada en solitario a unes elecciones, celebró ayeri l'actu central de la so precampaña, consistente na presentación d'un manifiestu de sofitu a les candidatures de la organización nacionalista.

L'actu de presentación del manifiestu, que soscriben un total de 100 firmantes representativos del mundu asturianista nos ámbitos de la política, la cultura, la lliteratura o la música, presentólu'l responsable de campaña d'IAS Xosé Nel Comba, falando darréu d'elli Norberto Martín, director del centru Rural Agrupáu de Queirúas y ún de los firmantes del manifiestu. L'actu remató con una intervención del númberu ún al congresu, Faustino Zapico, quien-yos agradeció a los firmantes el so compromisu y espunxo los motivos que llevaron a IAS a presentase a esta convocatoria, ente los que destacó la necesidá d'organizar una alternativa d'izquierdes con capacidá pa facer un discursu d'autogobiernu real nel que tien de tener un pesu importante l'autonomía financiera. Zapico atacó fuertemente a los partíos en gobiernu asturianu y al conceptu de "votu util" que remanen, que ye al so paecer, ún de los factores que caltienen l'actual inmovilismu políticu de la sociedá asturiana.

Ente les 100 persones qu'apoyen el Manifiestu d'IAS hai persones representatives del mundu políticu asturianista, de la cultura asturiana y de movimientos sociales, destacando ente ellos los conceyales asturianistes de Nava Arturo Redondo y Eduardo Torga y l'ex alcalde asturianista de la capital sidrera Xulián Fernández Montes. L'ex-conceyal asturianista por Villaviciosa Mundo Collada tamién ye otru de los políticos que sofiten a IAS nestes elecciones. Fuera del ámbitu políticu atópense les firmes de los profesores de la Universidá d'Uviéu Xose Antón González Riaño y Carlos Lastra y de músicos como Diego Pangua, Xuan Nel Expósito,
o Elías García. El manifiestu d'IAS atropa un númberu grande de firmes de sindicalistes de Suatea y CCOO, y tamién a militantes del movimientu de recuperación llingüística.