Hidroeléctrica vendió Retecal

La eléctrica asturiana Hidrocantábrico ta acabante de vender a la empresa de telecomunicaciones ONO el 35% de les acciones que tenía HC en Retecal, la operadora de cable de Castiella y Llión. L'importe de la operación nun ye públicu, pero pue andar ente los 60 y 80 millones d'euros.

Ono controla asina'l 100% de Retecal, la operadora ximielga de l'asturiana Telecable, que tamién va cambiar de manes d'equí a la vuelta de bien poco. Dende que la portuguesa EDP se ficiere esti veranu cola mayoría accionarial n'Hidroeléctrica, la intención de los portugueses yera centrase nel negociu eléctricu y desfacese de toles demás estayes de negociu, un procesu que tamién pue ayudar a recuperar activos pa financiar la compra d'HC.

La parte de Retecal ye la que menos importa dientro del conxuntu d'inversiones d'HC nes telecomunicaciones, siendo l'ayalga l'asturiana Telecable, una empresa onde HC tien el 45% de les acciones. Si la operación en Retecal paecía lóxica en cuantes qu'ONO tenía una opción preferencial por ser yá sociu mayoritariu, la batalla por Telecable abulta mui distinta, y delles fontes consultaes por esti mediu dicen que Telecable va caer en manes d'AUNA. Hai pistes qu'apunten a que la operación podía tar yá apalabrada, y asina, por exemplu la compañía d'aniciu catalán fizo esti veranu una campaña d'encuestes a abonaos Telecable nes que los se presentaba como "la compañía que ta acabante de mercar Telecable". Pela parte d'ONO, el presidente de la compañía Eugenio Galdón yá declaró qu'ellos nun teníen interés en Telecable.

Telecable ye un carambelu bien llambión nel mercáu. La quinta operadora de cable n'España, pasa con muncho del númberu de clientes que tien Retecal y entró por primer vegada en beneficios a últimos del 2003