Hidroeléctrica pue fusionase con Fenosa

Según un confidencial d'Internet, Hidrocantábrico tien los díes contaos. La eléctrica asturiana pue pasar a formar parte del proyectu ibéricu de la portuguesa EDP. La eléctrica lusa, qu'entovía ta participada pol Gobiernu de Portugal nun 30%, tien la intención declarada de controlar l'asturiana Hidrocantábrico esti mesmu añu, pa lo qu'anda en tratos cola alemana ENBW pa facese col 35% que tien esta otra compañía nel accionariáu d'HC. Algamar la mayoría accionarial en Hidrocantábrico ye´l primer pasu na estratexa d'EDP p'afitase nel mercáu ibéricu. El segundu ye entamar un procesu pa controlar Unión Fenosa col oxetivu final de fusionala con Hidrocantábrico.


Les bones rellaciones ente Lisboa y Madrid faen posible esti asaltu portugués a les empreses eléctriques del Estáu. Xunta'l bon clima políticu apaez la figura de la compañía alemana ENBW que cada vegada tien menos interés na compañía astur. Según dellos analistes financieros especializaos nel sector d'utilities la salida d'ENBW d'HC ta cantada dende va tiempu. Per otru llau, el presidente d'Unión Fenosa almitía nuna entrevista n'Invertia.com la posibilidá real de fusión ente la so compañía y HC. Ello ye que'l futuru d'Hidrocantábrico ya pasa más per Lisboa que per Uviéu.