Hidrocantábrico fai un apueste pol renovable

Hidrocantábrico y Caxa Madrid dieron anuncia de que quieren facer un apueste fuerte pol negociu conxuntu que tienen d'enerxía renovable. La eléctrica asturiana y la caxa madrilana cuenten con invertir, al través de la sociedá Sinae, na que HC tien el 80% y la caxa l'otru 20%, 730 millones d'euros d'equí al 2007 pa conseguir una potencia instalada de 856 megavatios n'enerxíes renovables en tol estáu, ello ye, cásique la mesma potencia que tien la central térmica d'Aboño.

Sinae participa anguaño en más de 40 instalaciones de renovables ente eólica, biomasa y purines, con una potencia instalada de 200 megavatios y ta trabayando anguaño en proyectos pa poner otros 280 megavatios en parques eólicos asitiaos n'Albacete, Burgos y Asturies, que van echar a andar pal añu qu'entra. Amás d'esto, Hidrocantábrico va fusionar con Sinae a Genesa, la otra filial que tien pal negociu de les renovables y que ta especializada en coxeneración, procedimientu qu'aprovecha'l calor residual de les instalaciones xeneradores.