HC puya pol gas vascu

La empresa asturiana HidroCantábrico tien bien de papeletes pa ganar el concursu del Gobiernu Vascu pa privatizar el holding empresarial gasísticu Naturcorp. Amás d'HidroCantábrico hai otres tres empreses finalistes nel concursu: Iberdrola, güei d´actualidá pola OPA que-y fizo Gas Natural, el grupu italianu Enel, tamién propietariu anguaño de la cántabra Eléctrica del Viesgo, y la propia Gas Natural.

Dientro del proyectu de privatización llamen l'atención los criterios qu'afitó'l Gobiernu Vascu pa toes aquelles empreses que tuvieren interés n'entrar al concursu col oxetivu de garantizar el calter vascu de la empresa. Por poner un casu, la empresa compradora va tener que dexa-yos representación nel conseyu d'alministración a caxes d´aforros, ayuntamientos y diputaciones, pero la condición más importante que llantó l'executivu de Vitoria ye que la empresa que merque Naturcorp va tener que garantizar la permanencia ellí de la dirección de negociu y la sede de Naturcorp. Nesti sentíu los cabezaleros d´Iberdrola yá dieron anuncia la selmana pasada a un grupu d´empresarios vascos en Bilbao que l'oxetivu d'ellos yera facer apueste por Euskadi, caro qu'esi apueste tamién ye, pola propia lletra del concursu, el d'HidroCantábrico.

Incluso más qu'eso. A lo llargo de tol añu pasáu el Gobiernu asturianu tuvo tirando pola construcción d'una regasificadora en Puertu d'El Musel, pero HC nun fizo otro que dar llargues a les instituciones asturianes, alegando que como empresa teníen los sos propios planes pa furnise de gas. Anque la regasificadora de Bizkaia, participada por Naturcorp, nun entre de momentu nel paquete a privatizar, l'enfotu d'HC por meter el cazu nel consorciu vascu que l'apadrina podría ser una esplicación a la falta d'interés de la eléctrica pol proyectu del executivu astur.
La planta regasificadora vasca cuenten con echala a andar esti añu, y yá tien comprometida una ampliación de capacidá. Otramiente, Iberdrola, que yá participa nel accionariáu de la regasificadora, tamién se presenta al concursu

Anguaño Naturcorp ye propiedá al 100% del Ente Vascu de la Enerxía (EVE). La corporación EVE tien el 79,5% de Gas d´Euskadi, el 50% de Gasnalsa, el 49,5% de Donostigas y el 50% de Bilbogas. Los activos gasistes de Naturcorp tienen un valor contable sobre los 107,5 millones d´euros, anque nel mercáu podríen valer 6 o 7 veces más. De toles formes el procesu privatizador nun diz de cuánto ye la participación en venta, sinón que señala que la mesma tien que permiti-y al comprador tener mayoría estable pa facese cargu de la xestión de la empresa. El Gobiernu Vascu dará anuncia del ganador a últimos d'esti mes.