HC ganó'l concursu del gas vascu

El gobiernu vascu alxudicó-y ayeri pela tarde a l'asturiana HidroCantábrico'l concursu de privatización del 62% del holding gasísticu euskaldún Naturcorp. La ufierta de compra d'HidroCantábrico valoró los activos de Naturcorp en 537 millones d'euros, que l'asturiana va poner d'una parte aportando los activos de Gas d'Asturies y Gas Figueres (277 millones) y d'otra pagando-y al Gobiernu vascu lo que falta. La empresa resultante de la fusión Gas d'Asturies-Naturcorp ye'l segundu operador gasísticu español, con más de 500.000 clientes y con importantes contratos d'aprovisionamientu de gas como'l que yá tienen firmaú cola caribeña Atlantic LNG por importe de 2bcn. En cuantes al repartu d'acciones HC tien el 62%, l'Ente Vascu de la Enerxía'l 32,8% y el 5% l'Ayuntamientu de San Sebastián

HC presentábase a esti concursu en competencia col grupu italianu Enel, Gas Natural y Iberdrola, que sal de la privatización como la gran perdedora, en cuantes que la eléctrica vasca, que xugaba en casa, presentare una ufierta de compra que-yos abultaba imbatible a los responsables de la eléctrica, ello arriendes de ser Iberdrola sociu de Naturcorp en dellos proyectos como la regasificadora de Bizkaia. La OPA fallida de Gas Natural sobre Iberdrola bien pudo influyir en que la vasca nun ganare'l concursu, anque estes decisiones nunca nun tan llibres de criterios políticos.


El Gobiernu asturianu y tola oposición felicitáronse pol trunfu d'HC, qu'afita a Hidrocantábrico como ún de los grandes grupos gasistes de la península al pesllar una operación d'envergadura tala que yera impensable va seyes o siete años pa la empresa asturiana. Ello evidencia'l papel nuevu d'HC nel mapa eléctricu como cabeza de puente na península de dos grandes grupos europeos (EDP y EnBW, filial alemana de la francesa EDF) pero tamién los riesgos d'esi crecimientu.

Ello ye que, anque ye efectivamente HC quien tien agora'l 62% del capital de Naturcorp, les condiciones de la venta imponen que se caltengan los centros de dirección n'Euskadi, país onde'l plan d'inversión venceyáu a la compra tamién presenta inversiones por 214 millones d'euros. El tresllau a Euskadi de tol negociu del gas (anque Gas d'Asturies vaya seguir esistiendo nominalmente) apunta'l camín de la marcha d'Asturies de gran parte de los centros de decisión y activos d'una empresa que lleva invertío estos años más fuera del país que dientro. L'apertura de la térmica de ciclu combináu en Navarra primero, la espansión comercial per Valencia depués y agora la marcha del negociu del gas a Euskadi espeyen lo que yá ye una descentralización real a la conquista de los mercaos españoles que nesti casu va dir acompañada de la marcha de los centros de dirección del negociu.

Agora queden colingando'l futuru de la regasificadora y central a gas de la Bahía de Bizkaia, qu'anque de mano nun entraben nel paquete a privatizar sábese que'l Gobiernu vascu quier alxudica-ylos al ganador del concursu.

Esta ye la segunda aventura, en bien pocos meses, d'una empresa asturiana n'Euskadi depués de que Duro Felguera puyase pol xigante de los bienes d'equipu Babcock-Wilcox, operación que la Duro acabó por dexar pa prau más pol pasivu col que diba tener que cargar en casu de facese cola Babcock que por presiones polítiques dende l'ámbetu nacionalista y sindical vascu.