Guti Gaiteru del Sur

"Gaiteru del Sur" ye'l títulu del discu del gaiteru José Manuel Fernández Gutiérrez, más conocíu nel mundu de la gaita como Guti.

Guti ye ún d'esos nomes que lleven resonando tola vida nel mundu del folk y de la gaita asturiana. Formó parte de dellos de los primeros grupos de folk n'Asturies, "Xalabán" o "Gandúl" son un exemplu d'ello. Posteriormente grabó xunto en 1990 cola orquesta sinfónica de Santiago de Chile "Nos mares del sur", discu onde suena la gaita asturiana acompañada por una orquesta. Posteriormente centróse na xera de profesor de gaita, dexando un poco de llau la posibilidá de nueves grabaciones.

Con esti "Gaiteru del sur" Guti volvió a los estudios de grabación con un discu realmente sorprendente. De primeres podemos pensar qu'esti ye un discu "de gaiteru" más, pero Guti decidió apostar por otru estilu. Normalmente nesti tipu discos podemos topar delles canciones de gaita tambor siguiendo los cánones tradicionales, pieces con igües de grupu folk y dalguna rareza. Pues bien, en "Gaiteru del sur" son les "rareces" les que marquen la pauta del discu. Por ello tenemos pieces con programaciones como en "Pasucais de la Madreña", cantares con igües averaes a un soníu jazz como "Gaiteros del sur", guitarra flamenca en "Na taberna'l puertu", anque tamién hai sitiu pa dalgunos cantares con igües clásiques del mundu del folk. Ye un discu que fuxe del virtuosismu, nél manden más les igües y la mezcla de soníos que la demostración de calidá del gaiteru, anque Guti si reservó un corte del cd pal perconocíu Floréu de Remis, onde'l gaiteru ufierta la so versión del mesmu, algamando durante'l mesmu notes non mui habituales na gaita asturiana pola altura de les mesmes.

En resumen un trabayu editáu por "L'Aguañaz", producíu por Jacobo De Miguel y Fernando Arias, col técnicu de soníu Sergio Rodríguez, y que contó cola collaboración de músicos de la talla de Fernando Arias, Alejandro Espina, Jacobo de Miguel, Harry Price, Mónica Nuñez, Puri Penín, Manuel León, Jordi "El Flaco", Pepe Manzano y Ricardo Solis.