Guerra de precios na conexón a Internet

Telefónica dio anuncia de la xuba de la velocidá del so serviciu de conexón a internet ADSL. La compañía de telecomunicaciones va dobla-yos la velocidá de conexón a tolos usuarios ensin xubir los precios. Asina, los usuarios que paguen al mes 39 euros por una conexón de 256 Kbp pasen a una velocidá de 512 Kbp ensin cambeos nel preciu. Telefónica informó ), d'esti nuevu cambéu per escrito al organismu regulador, la Comisión Nacional de Telecomunicaciones (CMT) qu'agora tien que dar el vistu bono y analizar la propuesta de la operadora.

Esta nueva iniciativa tamién afecta a les empreses mayoristes d'ADSL a les que Telefónica-yos vende'l serviciu.

Delles de les compañíes afectaes pola rebaxa son Ya.com, Tiscali y Wanadoo, operadores que merquen el serviciu de Telefónica pa revendelu ya qu'elles nun tienen infraestructura propia cola que poder competir col ex monopoliu. Por llei la compañía Telefónica vende a mayoristes los sos servicios con un descuentu del 40% pa que puedan competir anque nel sector ven esti descuentu insuficiente y apunten a un descuentu mínimu necesariu del 70%. EL casu ye que Telefónica pon el preciu a mayoristes orientáu a beneficiu cuando tenía que ser orientáu a costes. Esto lleva a que la compañía tea beneficiándose d'un monopoliu encubiertu y deriváu d'una posición más que predominante nel mercáu.

L'aventura de Telefónica va supone-y una inversión penriba los 10 millones d'euros ya que tienen que facer munches reformes nes redes y centrales de la compañía.

Pero les otres operadores tamién van vese obligaes a facer cambeos nes infraestructures de les redes nun momentu que nun ye mui afayaizu pa les sos cuentes financieres. L'oxetivu de Telefónica ye abrir el mercáu y potencialu ya que ye un separtáu mui rentable pa la compañía. Per otru llau ye una forma de frenar la competencia que nos últimos meses apaecíeren delles ufiertes mui interesantes como la de conexón ADSL a 256K del rexistrador de dominios Arsys por menos de 30 euros al mes. Tamién tienen munchu puxu les conexones por cable, onde en delles comunidaes -casu d'Asturies con Telecable- l'ADSL de Telefónica yá nun ye'l líder del mercáu. Les operadores de cable Ono y Auna van tener que replantegase'l negociu énte la competencia del ex monopoliu estatal.

Telefónica tien el 61% del mercáu d'ADSL n'España, algamando una cuota del 72% si se tien en cuenta a la filial Terra que tamién ufierta serviciu de conexón ADSL. Anguaño hai casi 2 millones de conexones ADSL n'España con una xuba d'alrodiu 60.000 nueves conexones al mes. L'apueste últimu de Telefónica ye'l d'ufiertar una conexón a 4 Mb, una ufierta que sedría única nel mercáu.