Greenpeace sonsaña "El día de mañana"

Nos cines asturianos pue vese dende esti vienres la película "El Día de mañana" una cinta de cine catastrófico qu'anticipa la desapaición de la civilización occidental somorguiada por un "tsunami" bíblicu productu de la fusión del xelu de los polos per aciu del calentamientu global.

Con motivu de la estrena d'esta nueva superproducción, la organización ecoloxista Greenpeace presentó esta selmana una web ximielga paralela a la oficial de la película, dientro de la campaña internacional de la organización pa frenar les emisiones de gases d'efectu invernadoriu

Na web de Greenpeace puen vese les consecuencies del cambéu climáticu y la realidá de les mesmes al traviés dun trailer que -ensin efectos especiales- enseña los efectos reales del calecimientu de la tierra, too ello mecío con datos científicos. La web ecoloxista apunta directamente a l'Alministración Bush como ún de los mayores culpables y responsables del cambéu climáticu polos enzancos que-y pon al Protocolu de Kioto.