Gonzali Producciones doblará al asturianu una película checoslovaca que bebe del mundu de Verne

Pal segundu trimestre del 2013 Gonzali Producciones centrará los sos esfuercios en doblar la película checoslovaca ‘Vynález zkázy’, que n’asturianu llevará’l nome de ‘Inventu diábolicu’. Anguaño ta trabayando cola cinta ‘Charade’.

La productora asturiana va dar asina un xiru al so trabayu, yá qu’hasta la fecha venía doblando llargometraxes al asturianu dende l’idioma inglés: ‘Vynález zkázy' ta rodada en checu, una llingua falada por 12 millones de persones nel mundu. Sicasí, Gonzali Producciones sigue apostando por un cine de calidá, yá qu’esta cinta, del añu 1958, fírmala’l xeniu de l'animación mundial Karel Zeman y ta basada nel siempre interesante mundu de Jules Verne. Asina, la película baraxa conceptos  y idees de les obres del escritor de Naunnt, anque se centra de manera principal en ‘Face au drapeau (Énte la bandera)’, del 1896. Según espliquen dende Gonzali Producciones, “el filme combina a

actores reales con marionetes y animación, y tamién decoraos planos con perspectiva distorsionao”. El cineasta nacíu n’Ostroměř en tiempos del Imperiu Austrohúngaru, allugólos nel planu como marionetes pa nun romper l'harmonía del conxuntu. “Esa síntesis, entamada en blanco y negro, da una mestura homoxéneo ente tolos elementos que tien un resultáu impactante”, añaden.

Zeman, mui influenciáu pola tradición de marionetes esistente na antigua Checoslovaquia y pol so apegu a la obra del francés George Méliès, utilizó’l trucaxe, la sobreimpresión y el collage a la perfeición pa dar un movimientu a los grabaos col que crear “una suxestiva dómina del vapor enllena de prodixos mecánicos imposibles, submarinos y estremaos globos aerostáticos”, lo que fai qu’esta esta cinta sía portentosa no visual. “El director usó la técnica del esgrafiáu en tolos elementos d'esti trabayu cinematográficu –decoraos, traxes, ambientación... – consiguiendo un acabáu en pantalla perasemeyáu al d'una plancha d'aceru grabao”, apunten dende la productora.

No que respeuta a la historia, ésta xira alredor de la figura de Thomas Roch, inventor francés que fai un esplosivu d’una capacidá destructiva pergrande. El conde Artigas, tres conocer el so descubrimientu, secuéstralu y treslládalu, en barcu y submarín, a una base secreta asitiada nuna isla volcánica en metá del océanu. Ellí, con engañu, llogra convencer al profesor pa que trabaye col envís de facer un arma que-y permita gobernar el mundu, pero Simon Hart, el so asistente, tamién reteníu na islla, fadrá tolo posible pa torgar los planes del conde. Cola ayuda de Jana, una moza náufraga, manda un mensaxe d'alvertencia dientro d'una botella aventada al mar, pero'l conde yá terminara la creación d'un enorme cañón potenciáu pol inventu de Roch. Hai que destacar que la película, “una metáfora sobre l'emplegu de la enerxía atómica y sobre cómo l'home utiliza la ciencia pa oxetivos destructivos”, ta narrada en pasáu al traviés de les páxines del diariu de Hart. La trama alvierte de los peligros de la teunoloxía y la invención que da nome al filme ta considerada como un anticipu de la bomba atómica.

Na semeya, Karel Zeman –a la derecha– da indicaciones mentes el rodaxe de ’Vynález zkázy'.