García López, investida doctora honoris causa

|
María Esther García López doctora honoris causa pol Claustru Doctoral Honoris Causa

La escritora, que fixo'l discursu n'asturianu, recibió en Madrid esti títulu honoríficu del mexicanu Claustro Doctoral Honoris Causa.

L'Ateneo de Madrid foi'l llugar onde se desendolcó la ceremonia d'investidura como doctora honoris causa de María Esther García López el 24 de mayu cola presencia de l'alcaldesa de Castrillón, Yasmina Triguero, y l'alcalde de Valdés, Óscar Pérez Suárez, y la conceyala Clara García Pérez, amás de personalidaes como'l presidente del Centro Asturiano de Madrid, Valentín Martínez-Otero; el de la Federación Internacional de Centros Asturianos (FICA), Manuel de Barros; la xaponesa concertista profesional de Koto, Yoshie Sakay; la compositora asturiana Ana Vázquez Silva; o la representante de Los Académicos de Argamasilla de Alba, Cristina Hilario, ente otros. Un actu mui emotivu pa la presidenta de l'Asociación d'Escritores d'Asturies, que tuvo acompañada pola so familia.

El nomamientu ta avaláu, robláu y selláu polos rectores de seis universidaes y diez instituciones de sonadía internacional "en reconocimientu a la so escelencia profesional y destacáu lideralgu en favor de la sociedá y la cultura". El Conseyu del Claustru Doctoral Honoris Causa que decidió esti títulu tuvo formáu polos representantes de la Universidad Anglohispano Mexicana, la Universidad de Matanzas, la Universidad del Norte de Tamaulipas, la Universidad Latinoamericana de México, la University of London, el Colegio de Empresarios Excellentia Fervic, el Consejo de Educación y Capacitación Queretano 'Cudeq', l'Instituto Multidisciplinario en Alta Dirección (IMAD), el Colegio de Abogados del Estado de México, el Centro de Investigación SELPER Cuba y l'Asociación de Egresados del Instituto Politécnico Nacional.

Nel actu d'investidura todos los doctores pronuciaron los sos discursos d'investidura nes sos llingües, polo que se pudo sentir el castellanu, l'inglés y l'asturianu, amás del árabe cola ayuda d'un traductor.

Contador Estadistiques