Galán llevó’l VI Entaína a Escribir de microrrellatos improvisaos pa mozos

|
Ganadores VI Entaína a Escribir

El testu ‘La llibretina’, d’Inaciu Galán, resultó ganador del VI Entaína a Escribir. El concursu de microrrellatos improvisaos pa moces y mozos de 14 a 35 años celebróse per primer vez en Xixón, en LLABoral Centru d’Arte y Creación Industrial nel Día de les Lletres, con 8 participantes.

Venti minutos tuvieron pa desendolcar un testu lliterariu a partir d’un tema propuestu pola organización al entamu del concursu, nesta ocasión el versu “que lloñe mos queda la paz coles palombines xintándonos la conciencia” de Nel Amaro, autor al que taba dedicada esta Selmana de les Lletres Asturianes que precisamente pesllaba esta actividá. Adolfo Camilo Díaz, Laura Marcos y María Xosé Rodríguez López conformaron el xuráu, que lleó tolos testos y decidió los trés meyores.

El primer premiu foi pa Galán con ‘La llibretina’, un microrrellatu inspiráu na figura d’Esperanza, poeta xixonesa conocida por acompañase de palombes peles cais de Xixón. En segundu llugar quedó Alma Hidalgo con ‘Fiebre d’iviernu’, mentes que terceru resultó Gonzalo Llamedo con ‘El Decamerón de Pumarín’.

Les recompenses pa los trés escritores mozos foron dellos llotes de llibros. Entaína a Escribir entámalu la Direición Xeneral de Política Llingüística y l'Institutu Asturianu de la Mocedá y contó cola asistencia d’Antón García y Clara Sierra.

Na semeya, Serra, García, Llamedo, Hidalgo, Galán, Díaz, Rodríguez López y Marcos.

Ésti ye'l testu ganador:

La llibretina’

Aquella muyer del barriu alimentaba a les palombes cada día, de forma cuasi compulsiva. Viérala dende neñu engurriase adulces, anque a min yá me paecía mui vieya cuando probatiblemente nun lo sedría tanto. Yera mui conocida ellí, con nomatos variaos acordies col ciñu o la zuna de caún con ella y les sos acompañantes con ales.

Col tiempu descubrí qu’aquella muyer yera tamién poeta. Repartía pan a les palombes y dacuando sacaba un versu escritu nun papel puercu y regalaba poeminos curtios, inspiraos nel amar o nel odiar, nel desasogiegu o na calma d’un día nel parque coles sos amigues alaes. Nunca nun m’atreví a averame a ella, pero podíame la gana de lleer aquellos versos de los que tanto me falaren.

Una nueche vila durmiendo nun portal y d’una de les bolses que carretaba asomaba una llibreta, la llibretina onde escribía los sos poemes. Nun lo pensé, acerquéme sele y quité-yla.

Al otru día supi que morriera de fríu naquel portal. Como si quita-y aquellos poemes fuera quita-y un cobertor.

Nunca fui quien a lleer los oemes. Guardo la llibterina pero nun soi a ello. Cuando voi al parque tán eses palombres, mirándome, xintándome la conciencia. ¡Qué lloñe me queda la paz!

Contador Estadistiques