Gaita Asturiana n'internet

L'instrumentu asturianu más conocíu ye ensin duda la gaita, y esta fama espéyase nes webs y llistes que se creen n'internet alrodiu d'esti instrumentu.

La creación de la primer llista d'internet sobre gaita asturiana n'inglés ye un datu que fai qu'echemos una güeyada los recursos sobre la gaita asturiana n'internet. Esta nueva llista quier ser llugar na rede pa que los gaiteros de norteamérica tenga un puntu de reunión, y puedan al traviés d'ella intercambiase información, repertoriu y cuestiones rellacionaes cola gaita asturiana.

Amás d'esta llista hai que destacar n'internet la web de la gaita asturiana que podéis consultar dende esti mesmu diariu. Nella podíes topar noticies, artículos d'interés p'aficionaos o pa gaiteres y gaiteros. Pero per internet tamién topamos iniciatives particulares qu'amás de falar sobre Asturies faen un casu especial a la gaita. Nelles tenemos artículos sobre la historia de la gaita, esplicaciones sobre la morfoloxía de la mesma o pequeños métodos pa deprender a tocala. Tamién que fixáse nes webs de la xente que toca l'instrumentu, dende gaiteros solistes hasta bandes de gaites tamién son una bona forma d'averase al mundu de la gaita asturiana. Esiste una web especial qu'aconceya nun sitiu la mayor cantidá d'enllaces sobre gaita asturiana y otres gaites y que convidamos a visitar nesta dirección.