Fulgencio Argüelles ganó'l Premiu "Café Gijón" de novela

L'autor asturianu Fulgencio Argüelles ganó esta selmana cola novela 'El palacio de los ingenieros belgas' la LIII edición del prestixosu Premiu de Novela "Café Gijón" 2003, dotáu con 18.000 euros y la publicación de la obra.

La novela, que va espublizar la editorial Acantilado, trata la historia iniciática d'un guaje que trabaya de xardineru y trescurre nun llugar d'Asturies ente últimos de los años 20 y primeros de los 30, el tiempu en qu'acaba la dictadura de Miguel Primo de Rivera y de los primeros años de la república

Llicenciáu en Sicoloxía pola Complutense y trabayador nel departamentu de recursos humanos d'una entidá bancaria, Argüelles tien una carrera lliteraria curtia pero estrada de reconocimientos, entamando pola so primer novela "Letanías de lluvia" Premiu Azorín nel 1992 y siguiendo pola novela histórica "los clamores de la tierra" que trata'l tema d'una conspiración palaciega na corte de rei asturianu Ramiro I, siendo la primera obra del xéneru que se metió per esti interesante periodu históricu. En 1999, Argüelles escribió "Recuerdos de algún vivir", última novela hasta agora d'esti escritor, ún de los más interesantes de la narrativa asturiana en llingua castellana d'anguaño.