Fuerte xuba del euru énte les perdes de les bolses

Selmana de blincos pa les bolses poles perimportantes duldes énte los febles datos macroeconómicos. L´Ibex cayó a lo llargo la selmana'l 2,09% anque´l vienres peslló en positivu con una probetaya xuba del 0,42% p´asistiase nos 6.346,20 puntos. Muncha volatilidá nos mercaos bursátiles mentantu que les cayíes nel Vieyu Continente son les más importantes nos últimos dos meses.



El protagonista de la selmana foi ensin dulda l´euru. La moneda europea, tres de siete selmanes de xubes, llegó a romper la barrera de los 1,175 pa mangase un intre penriba los 1,18 dólares. Tala fuercia del euru nun se recordaba dende que s'acuñare en xineru de 1999. La venta de dólares foi continua a lo llargo de la selmana pasada.

El previsible descensu de les esportaciones pola perda de competitividá de les empreses europees poles xubes del euru emburrió les perdes nes bolses europees. La permala situación económica d´Alemaña y la mala traza de los resultaos de delles empreses nun prestaron a los inversores. Los bancos y les principales multinaciones europees nun tuvieron una bona selmana en bolsa al sofrir perimportantes cayíes pol peligru de perda de competitivá nos mercaos internacionales. Los valores más afectaos foron los que tienen mayores esportaciones nel mercáu norteamericanu, sobremanera les empreses del sector automovilísitcu, químicu y enerxéticu. El vienres hebo un pequeñu repunte técnicu de les bolses europees dempués d´una selmana de perdes y énte un llunes de fiesta en Wall Street y en Londres. Los inversores cuenten con que'l martes entamen les compres y les xubes de dellos valores, pero lo que importa de verdá ye la posibilidá de que´l Bancu Central Europeu (BCE) baxe los tipos d´interés el prósimu 5 de xunu.

Wall Street nun tuvo una selmana positiva, anque´l vienres pasáu los inversores agasayaron les nueves midies fiscales del Gobiernu Bush, qu'incluyen un recorte fiscal de 350.000 millones de dólares.El proyeutu de recorte d´impuestos parte de quita-yos carga fiscal a los ricos baxando la tasa d'impuestos sobre dividendos y ganancies hasta´l 15% hasta 2008, asina como incentivos fiscales pa que les empreses camuden les sos infraestructures y equipos. El resume selmanal de Wall Street ye negativu, con una baxada del Dow Jones del 0,91% y una cayida del índiz tecnolóxicu Nasdaq del 1,85%. El Dow asistiose'l vienres pasáu nos 8.601,38 puntos y el Nasdaq nos 1.510,09.

El parqué madrilanu trancó la selmana con una feble xuba del selectivu Ibex del 0,42%. BBVA y SCH xubieron con fuercia'l vienres pasáu dempués d´una selmana ramplona pal sector bancariu européu. Metrovacesa, Ferrovial y NH Hoteles piesllaron en positivo. Les mayores xubes foron pa Zeltia y Gamesa, dambes penriba'l 2,5%. Perbona selmana pa NH Hoteles pola OPA hostil d'Hesperia pa facese col 26,1% del so capital. Dempués de negociar una OPA amistosa, Hesperia camudó la so estratexa y presentó la selmana pasada una ufierta de compra al marxe del Conseyu d´Alministración de NH Hoteles, qu'agora cotiza a 8,63 euros, 33 céntimos penriba del preciu d'OPA. Otramiente, valores como FCC, Repsol Unión FENOSA trancaron el vienres en negativo. El volume de negociación sigue mui baxu, con solo 1.000 millones d´euros negociaos. L'índiz xeneral de Madrid asistióse nos 663,85 puntos y l'índiz Nuevu Mercáu trancó nos 1.663,70 puntos.

Bona selmana pa la renta fixo y pal mercáu de materies primes, El petróleu xubió un 1,3 hasta los 263 dólares. L'oru yá val 368,5 dólares la onza. Nel mercáu de renta fixo el bund, bonu alemán, asistiose nos 106,94 puntos gracies al mal datu del IPC d´Alemaña. El bonu español calitense nos 104 puntos. De va tres selmanes p'acá la renta fixo sólo tuvo dos díis de cayíes lo que diz que los inversores siguen apostando polo seguro. La selmana qu´entama güei ye perimportante n'estadistiques: tan pa salir el PIB de los Estaos Xuníos y dellos indices de confianza empresarial y consumidores nel país norteamericanu y Alemaña. Los nuevos datos seldrán un nuevu emburrie pa que los inversores tomen o dexen posiciones en dellos valores bursátiles. Ver veremos.