"Fuentes de Invierno" esfarraple nel Puirtu Braña

El proyectu d'estación d'esquí y deportes d'iviernu n'Ayer ta topando la esperada oposición del movimientu ecoloxista, qu'aprovecha'l periodu d'información público del proyectu pa presentar les sos alegaciones. Asina, la Coordinadora Ecoloxista d'Asturies denuncia que'l proyectu pa la estación d'esquí de "Fuentes de Invierno" asitiada nel Puirtu Braña, parte de la idea d'urbanizar ensin aplicar criterios de sostenibilidá un área natural. La organización ecoloxista critica l'impactu de les infraestructures de la pista d'esquí, y quéxase de que la obra va precisar de pistes forestales y de meter maquinaria pesao p'acondicionar toa una fastera del monte. Con too y con ello, el comunicáu de la Coordinadora céntrase más nel efectu negativu de la urbanización que se cuenta con facer al llau de la instalación deportiva que nos efectos de remontes y telesielles

La Coordinadora diz que'l proyectu pretende aprovechar urbanísticamente una zona cola xida de la reactivación económica, pero ello pasa pela aplicación d'un turismu agresivu al que nun-y ven muncha viabilidá económica a mediu y llargu plazu, como demostraríen otres estaciones d'esquí de la redolada. Asina, la estación de Valgrande-Payares presenta cientos de miles d'euros de perda cada añu, y otru tanto pasa cola de San Isidro, en Llión. Los ecoloxistes argumenten tamién que'l cambéu climáticu ta afectando enforma a los ciclos de la ñeve, colo qu'a lo llargo de la temporada cada vegada son menos los díes en que les estaciones puen abrir, un fenómenu que-yos compromete dafechu la rentabilidá, causa qu'esplicaría por qué nengún inversor particular quixo facese cargu del proyectu

Con too y con ello, la Coordinadora sí ve una clas d'inversor priváu que quiera enfotase na estación d'esquí, la de los promotores urbanísticos, que fadríen bon negociu especulando colos terrenos comunales pa la construcción de viviendes y apartamentos al rau de la inversión pública, entamando asina una iniciativa urbanística que los conservacionistes nun ven apropiada pa un llugar que presenta unos índices curiosos de conservación mediuambiental y paisaxística como ye'l casu del Altu Ayer. La presencia de la estación tamién llevaría arreyada una carretera nueva dafechu y unos aparcaderos que meteríen nel llugar una presión de tráficu rodáu hasta agora insistente.

Sobre les especies animales que dañaría la presencia de la estación, la Coordinadora ve que la estación diba ser otra muria más que separtare a les poblaciones occidental y oriental d'osu pardu, y tamién una invasión nos cantaderos de faisán montés.