Frente común pol corredor atlánticu y movimientu del ministeriu al nomar un comisionáu pal mesmu

|
Adrián Barbón, Alfonso Rueda y Alfonso Fernández Mañueco alcuentru corredor atlánticu Santiago

Asturies, Galicia, y Castiella y Lleón celebraron esti vienres en Santiago de Compostela una cume pa facer fuercia na reclamación del corredor atlánticu ferroviariu, actu al que’l ministeriu taba convidáu a participar namái como asistente. Tresportes, sicasí, fixo un movimientu esta mesma xornada al nomar un comisionáu pal so desendolcu.

El socialista Adrián Barbón y los populares Alfonso Rueda y Alfonso Fernández Mañueco acudieron al ‘Alcuentru del Corredor Atlántico Noroeste: una estratexa conxunta pa un proyeutu común’ entamáu poles trés alministraciones y asoleyaron una ‘Declaración institucional d’impulsu al corredor atlánticu noroeste de ferrocarril’ pa esixir al Gobiernu estatal “un Plan Direutor del Corredor Atlánticu de mercancíes ferroviaries que planifique de forma detallada y calendarizada les inversiones y actuaciones necesaries na infraestructura ferroviaria”. Como testigos, los responsables de los puertos de Xixón, Avilés, A Coruña y Vigo, l’empresariáu de les trés autonomíes y representantes sindicales y políticos, que se sumen a esta reivindicación tan importante pal noroeste peninsular.

A la cita taba convidáu’l Ministeriu de Tresportes, Movilidá y Axenda Urbana como asistente, non como participante, magar l’interés amosáu’l martes por Isabel Pardo de Vera, secretaria d’Estáu, na so visita a Asturies por tar presente. Sicasí, Madrid fixo un movimientu de bona voluntá al nomar esta mesma mañana un comisionáu pal desarrollu de corredor atlánticu, figura que yá esistía pal corredor mediterraneu y que demandó güei nes intervenciones Rueda.

Va encabezar esta delegación permanente “pal siguimientu y coordinación del corredor ferroviariu de la exa atlántica, una rede prioritaria pal Gobiernu” José Antonio Sebastián Ruiz, hasta agora xerente de Material de Renfe Mercancíes. En concreto la so función va ser “el siguimientu y actualización del Plan Direutor del Corredor Atlánticu, tanto del estáu de les infraestructures como de les polítiques d’esti Gobiernu n’allianza con Europa, rescamplando les conexones con Portugal y Francia. L’oxetivu ye asina axilizar la estensión de la infraestructura y de los servicios pa potenciar el tresporte de mercancíes per tren n’España y les conexones con Europa”.

Hai que rescamplar que na declaración conxunta de los trés presidentes incluyía una referencia al nomamientu, “primer resultáu de la efeutividá d’una aición coordinada ente les trés comunidaes autónomes, na confianza de que servirá p’articular les actuaciones rellacionaes col corredor y de qu’actúe como interllocutor col restu d’alministraciones y entidaes”.

Defensa d’intereses “ensin dir contra naide”

Barbón, nes intervenciones previes al asoleyamientu del documentu, asegurara énte’l públicu presente nel Palacio de Congresos e Exposicións de Galicia que “el Gobiernu d’España –y non sólo ésti, sinón tamién los anteriores– tienen una deuda histórica col Noroeste”. El socialista denunció’l “ataque d’insolidaridá” del empresariáu llevantín, críticu cola atención al corredor atlánticu, emponderó’l frente fechu por Asturies, Galicia, y Castilla y Lleón pa defender intereses comunes “ensin dir contra naide” y aseguró que “taré siempre ónde deba tar y con quién deba tar pa defender a la mio tierra, el Principáu d’Asturies”.

Na semeya, Barbón, Rueda y Fernández Mañueco.

Contador Estadistiques