Fred Morrison y Gueta Na Fonte, nos conciertos de Caxastur

Un garapiellu curiosu d'actuaciones musicales d'estilos distintos como'l folk, el jazz o el flamencu son el programa de "Música del siglo XX" qu'organiza Caxastur.

Esta riestra de conciertos ye mui abierta no que cinca a los estilos qu'ufierta. La música tradicional y folk van tener el so sitiu con artistes y grupos ente los que destaca la presencia del gaiteru Fred Morrison y el bouzouky de Jamie Mcmenemy. El primeru ye conocíu de vieyo y una referencia ente munchos músicos folk asturianos, énte los que va volver amosar la so increíble técnica cola gaita, esta vegada xunta'l bouzouky de Jamie Mcmenemy, cantante y músicu del míticu grupu de folk "Kornog".

N'otros estilos vamos poder ver música tradicional senegalesa de la mano de "Djbril Cissokho y Sora", al cantautor vasco "Tontxu", una curiosa unión de txalaparta y flamencu con "Palo Flamenco", jazz con "Tha Champs: Joe de Francesco y Ximo Tebar" o fado con "Piedade".

La representación del folk asturiano vien gracies al grupu xixonés "Gueta na Fonte", banda dirixía pol Mento Hevia que prácitca un estilu de folk sinfónico que sal del estilu habitual de les formaciones folk asturianes. Pa les feches y llugares de caún de los conciertos convidamos a los nuesos llectores a entrar na nuesa guia d'ociu.